صوبائی وزیر صحت خواجہ سلمان رفیق کی زیر صدارت ہیلتھ انشورنس کے ورکنگ گروپ کی سب کمیٹی کا ا جلاس

لاہور (اُردو پوائنٹ اخبارتازہ ترین - اے پی پی۔ 17 مئی2024ء) صوبائی وزیر صحت خواجہ سلمان رفیق کی زیر صدارت ڈی جی ڈرگز کے دفتر میں ہیلتھ انشورنس کے ورکنگ گروپ کی سب کمیٹی کا دوسرا اجلاس منعقدہوا۔ اجلاس میں سیکرٹری صحت علی جان خان، سپیشل سیکرٹری ڈویلپمنٹ سید واجد علی شاہ، وائس چانسلر یونیورسٹی آف چائلڈ ہیلتھ سائنسز پروفیسر ڈاکٹر مسعود صادق، وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز، سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، سی ای او پنجاب انسٹی ٹیوٹ آف کارڈیالوجی پروفیسر ڈاکٹر انجم جلال، ڈاکٹر علی ایاز صادق، ڈی جی ڈرگز ڈاکٹر سہیل اور ڈاکٹر زاہد پرویز نے شرکت کی۔

اجلاس میں ویڈیو لنک کانفرنس کے ذریعے پرنسپل شیخ زید ہسپتال رحیم یار خان پروفیسر ڈاکٹر سلیم لغاری اور پرنسپل بہاول پور میڈیکل کالج پروفیسر ڈاکٹر صوفیہ فرخ نے شرکت کی۔

(جاری ہے)

صوبائی وزیر صحت خواجہ سلمان رفیق نے اجلاس کے دوران ہیلتھ انشورنس میں اصلاحات کا جائزہ لیا۔تمام ماہرین نے اس حوالے سے قیمتی تجاویز اور آرا سے آگاہ کیا۔صوبائی وزیر صحت خواجہ سلمان رفیق نے اس موقع پر گفتگو کرتے ہوئے کہا کہ ہیلتھ انشورنس پروگرام کو عوام کیلئے سود مند بنانے کی کوشش کر رہے ہیں۔

ماضی میں صحت سہولت پروگرام کے نام پر عوام کے اربوں روپے ضائع کرنا ظلم کی انتہا ہے۔ قائد نواز شریف نے عوام کی بہتری کیلئے ہیلتھ انشورنس کا پروگرام شروع کیا تھا۔اب ہمیں ہیلتھ انشورنس کے پروگرام میں خرابیوں کو دور کرنا ہے۔سرکاری ہسپتالوں کی استعدادکاربڑھانے کی پوری کوشش کر رہے ہیں۔ ہیلتھ انشورنس پروگرام کے فنانشل ماڈل کو بہتر کرنا ہوگا۔ہمارے لئے سرکاری ہسپتالوں میں آنے والے مریض سب سے اہم ہیں۔ یونیورسل ہیلتھ انشورنس کے حوالہ سے ایکسپرٹس کی حتمی تجاویز اور آرا وزیر اعلی پنجاب کو پیش کی جائیں گی۔