حکومت کسانوں کیساتھ سوتیلی ماں جیسا سلوک کررہی ہی: ضیاء الدین انصاری

لاہور (اُردو پوائنٹ اخبارتازہ ترین - آن لائن۔ 14 مئی2024ء) امیر جماعت اسلامی لاہور ضیاء الدین انصاری ایڈووکیٹ نے کہا ہے کہ کسانوں کو ان کاحق دلوانے کے لئے ہم ہر حد تک جائیں گے۔جماعت اسلامی کسانوں کے ساتھ سیسہ پلائی دیوار کی طرح کھڑی ہے۔پنجاب بھر میںکسانوں کی جمع پونجی گندم کے شکل میں کھیتوں میں خراب ہورہی ہے جو حکومت کی کسان دشمن پالیسیوں کا کھلا ثبوت ہے۔

حکومت کسانوں کیساتھ سوتیلی ماں جیسا سلوک کررہی ہے جو کسی صورت قابل قبول نہیں ہے۔ 16 مئی کوو زریر اعلی ہاوس کے باہر بڑے احتجاج میں جماعت اسلامی کی بردار تنظیمات سمیت طلبہ اور وکلا ء ''حق دو کسان ''مارچ میں بڑی تعداد میں شرکت کریں گے۔ ان خیالات کا اظہار انہوں نے جماعت اسلامی لاہور کے زیر اہتمام 16 مئی کو مسجد شہداتا وزیر اعلی ہاوس تک '' حق دو کسان'' مارچ کی تیاریوں کو حتمی شکل دینے کیلئے بردار تنظیمات کے سربراہان کے اجلاس سے خطاب کرتے ہوئے کیا۔

(جاری ہے)

اجلا س میں سیکرٹری جماعت اسلامی لاہور خالد احمد بٹ، صدر کسان بورڈ پنجاب رشید مہنالہ، سیکرٹری سیاسی کمیٹی عامر نثار خان اورجمعیت اتحاد العلماء، تحریک محنت، نیشنل لبیر فیڈریشن، جمعیت طلبہ عریبہ، اسلامی جمعیت طلبہ، پبلک سیکرٹریٹ لاہور کے سربرہان و ذمہ داران نے شرکت کی۔ ضیاء الدین انصاری ایڈووکیٹ نے مزید کہا کہ ہماری ہم وطنوں سے بھی اپیل ہے کہ وہ کسان کا ساتھ دیں ورنہ کل گندم کے دانے دانے کو ترس جائیں گے۔