ہیلمٹ انفورسمنٹ مہم کے انتہائی مثبت اثرات سامنے آئے ہیں،عمارہ اطہر

بدھ 15 مئی 2024 12:41

لاہور (اُردو پوائنٹ اخبارتازہ ترین - اے پی پی۔ 15 مئی2024ء) سٹی ٹریفک پولیس آفیسر عمارہ اطہر نے کہا ہے کہ ہیلمٹ انفورسمنٹ مہم کے انتہائی مثبت اثرات سامنے آئے ہیں، ہیڈ انجری کیسز میں نمایاں کمی ہوئی ہے۔ بدھ کو جاری بیان میں انہوں نے بتایا کہ شہر کے متعدد شاہرات کو بغیر ہیلمٹ موٹر سائیکل سواروں کیلئے نوگو ایریا قرار دے دیا گیا ہے ۔ مال روڈ کے بعد اب شہر کے مزید روڈزجن میں جیل روڈ،کینال روڈ،مین فیروزپور روڈ، مین بلیوارڈ، کینٹ شامل ہیں جن پر اب موٹر سائیکل سوار بغیر ہیلمٹ سفر نہیں کرسکیں گے۔

انہوں نے کہاکہ ہیلمٹ کی پاسداری میں انہی کا فائدہ ہے،ہیلمٹ حادثات کیساتھ ساتھ آنکھ، ناک، کان کو بھی محفوظ رکھتا ہے،شہری اپنی اور اپنوں کے تحفظ کیلئے ہیلمٹ پہنیں، قانون کی پاسداری کیلئے اسی تناظرمیں تمام چوک،چوراہوں،شاہراہوں پر بغیر ہیلمٹ موٹرسائیکل سواروں کیخلاف کارروائیاں جاری ہیں۔

(جاری ہے)

عمارہ اطہر نے کہا کہ ہیلمٹ انفورسمنٹ مہم سے ہسپتالوں میں غیر معمولی لوڈ میں کمی دیکھنے میں آئی ۔انہوں نے کہا کہ 95 فیصد شہریوں کا ہیلمٹ پہننا خوش آئندہے، 5فیصد کیلئے مزید سختی کرنے کی ضرورت ہے۔سی ٹی او نے بتایاکہ رواں سال کے دوران 01 لاکھ 80 ہزار سے زائد موٹرسائیکل سواروں کیخلاف کارروائی کی گئی،بغیر ہیلمٹ موٹرسائیکل چلانے پر2ہزار روپے جرمانہ کیا جا رہا ہے۔