ًتیز گام ایکسپریس میں پریمیم لاؤنج ڈائننگ کار کا اضافہ ، 40 سے زائد کھانے موجو د ہونگے

و*ریلوے آمدن 70 ارب سے بھی زائد ، امسال ٹارگٹ سے 7 ارب زیادہ کما چکے ہیں: عامر بلوچ

بدھ 15 مئی 2024 21:50

>لاہور (اُردو پوائنٹ اخبارتازہ ترین - آن لائن۔ 15 مئی2024ء) پاکستان ریلوے نے تیز گام ایکسپریس میں پریمیم لاؤنج ڈائننگ کار کا اضافہ کر دیا۔ چیف ایگزیکٹو افسر پاکستان ریلویز عامر علی بلوچ نے لاہور ریلوے سٹیشن پر نئی ڈائننگ کار کا افتتاح کیا جو 20 مئی سے تیز گام ایکسپریس میں لگائی جائے گی۔ نئی ڈائننگ کار میں بیٹھنے کی جگہ کو مسافروں کی ڈیمانڈ پر مزید کشادہ کیا گیا ہے۔

پریمیم لاؤنج ڈائننگ کار میں ایک وقت میں 35 مسافر کھانا کھا سکیں گے۔ کار میں 40 سے زائد کھانے موجود ہوں گے جن میں سٴْوپ، برگر، پیزا، کڑاہی، سینڈوچ، پراٹھا رول، فرنچ فرائز، بریانی بھی شامل ہیں۔ اس سے قبل بہاء الدین زکریا ایکسپریس میں پریمیم لاؤنج ڈائننگ کار لگائی گئی تھی۔ زکریا ایکسپریس میں کامیابی پر نئی ڈائننگ کار کا دائرہ کار بڑھایا گیا۔

(جاری ہے)

پریمیم لاؤنج کی مقبولیت کے پیشِ نظر اگلے چند ہفتوں میں اسے خیبر میل اور علامہ اقبال ایکسپریس میں بھی لگا دیا جائے گا۔ چیف ایگزیکٹو افسر پاکستان ریلویز عامر علی بلوچ نے کہا ہے کہ نئی ڈائننگ کار کے اضافے سے مسافروں کا سفری تجربہ پہلے سے بہت بہتر ہو گا۔ انہوں نے کہا کہ ریلوے آمدن 70 ارب سے بھی زائد ہو چکی اور امسال ہم ٹارگٹ سے 7 ارب زیادہ کما چکے ہیں۔

انہوں نے کہا کہ ریکارڈ ریلوے آمدن کے ثمرات سہولیات میں بہتری کی صورت مسافروں تک پہنچائیں گے۔ عامر بلوچ نے کہا کہ واش رومز میں بہتری کیلیے اقدامات کا آغاز کر دیا ہے۔ پہلے مرحلے میں راولپنڈی، ملتان اور لاہور اسٹیشنز پر ایگزیکٹو واش رومز بنا رہے ہیں جو یکم جون کو فنکشنل ہو جائیں گے۔ انہوں نے کہا کہ ٹرینوں میں صفائی ستھرائی کیلیے بھی متعلقہ افسران کو ہدایات جاری کر دی ہیں، شکایات کی صورت میں سخت ترین ایکشن کیا جائے گا۔