اپریل میں غذائی اشیا ء کی برآمدات میں 23.19فیصد اضافہ

لاہور(اُردو پوائنٹ اخبارتازہ ترین - این این آئی۔ 18 مئی2024ء) خام غذائی اشیا ء کی برآمدات اپریل میں 23.19فیصد بڑھ کر 57کروڑ ڈالر تک پہنچ گئیں جن کا حجم گزشتہ برس کے اسی مہینے 46کروڑ 30 لاکھ ڈالر رہا تھا۔اعداد و شمار کے مطابق رواں مالی سال کے 10ماہ کے دوران خام غذائی مصنوعات کی برآمدات 45.61فیصد اضافے کے ساتھ 6ارب 23کروڑ تک پہنچ گئیں، جس کا حجم گزشتہ مالی سال کی اسی مدت کے دوران 4ارب 27کروڑ ڈالر رہا تھا۔

چاول کی برآمدات جولائی تا اپریل کے دوران سالانہ بنیادوں پر 80.13فیصد بڑھ کر 3ارب 28کروڑ ڈالر تک پہنچ گئیں، بھارت کی جانب سے مقامی صارفین کے مفادات کا تحفظ کرنے کے لیے چاولوں کی برآمدات پر پابندی عائد کی گئی تھی جس کی وجہ سے پاکستان سے برآمدات میں اضافہ ہوا۔باسمتی چاول کی برآمد میں 34.01فیصد کا نمایاں اضافہ ہوا، جو جولائی تا اپریل کے دوران 69کروڑ 92لاکھ ڈالر تک پہنچ گئی، جس کا حجم گزشتہ سال کی اسی مدت کے دوران 52کروڑ 17لاکھ ڈالر رہا تھا، نان باسمتی چاول کی برآمد جولائی تا اپریل کے دوران 98.64فیصد اضافے کے ساتھ 2ارب 58کروڑ ڈالر تک پہنچ گئی جو گزشتہ سال کی اسی مدت میں ایک ارب 30کروڑ ڈالر رہی تھی۔

(جاری ہے)

گزشتہ 2سالوں کے دوران برآمدات کے اعداد و شمار میں مسلسل اضافے کی وجہ سے باسمتی چاول کی اوسط قیمت 150روپے سے بڑھ کر 400روپے فی کلو ہو گئی جس سے مقامی صارفین کی خریداری محدود ہو گئی۔