گورنر پنجاب کا پیر مہر علی شاہ ایرڈ ایگری کلچر یونیورسٹی اٹک کیمپس منصوبے میں تاخیر کا نوٹس، کیمپس کی جلد تکمیل وکلاسوں کے اجرا کی ہدایت

لاہور (اُردو پوائنٹ اخبارتازہ ترین - اے پی پی۔ 19 مئی2024ء) چانسلر وگورنر پنجاب سردار سلیم حیدر خان کا پیر مہر علی شاہ ایرڈ ایگری کلچر یونیورسٹی راولپنڈی کے اٹک کیمپس منصوبے میں تاخیر کا نوٹس،کیمپس کی جلد از جلد تکمیل کر کے کیمپس کو فعال اورکلاسوں کا اجرا کرنے کی ہدایت کی ہے۔تفصیل کے مطابق چانسلر وگورنر پنجاب نے گورنر ہائوس میں پیر مہر علی شاہ ایرڈ ایگری کلچر یونیورسٹی راولپنڈی کے اٹک کیمپس کے بارے میں اہم اجلاس کی صدارت کی۔

گورنر پنجاب نے اجلاس میں پیر مہر علی شاہ ایرڈ ایگری کلچر یونیورسٹی کے اٹک کیمپس منصوبے پر پیش رفت کا جائزہ لیا۔ اس موقع پر گفتگو کرتے ہوئے گورنر پنجاب نے اٹک کیمپس کی جلد از جلد تکمیل کر کے کیمپس کو فعال اورکلاسوں کا اجرا کرنے کی ہدایت کی۔

(جاری ہے)

گورنر پنجاب نے کہا کہ کیمپس کی تکمیل سے اٹک اور گرد و نواح کے طلبہ کو اعلی وجدید تعلیم حاصل کرنے کے مواقع میسر آ سکیں گے۔

انہوں نے کہا کہ ملکی ترقی میں اعلی تعلیم کا کلیدی کردار اور دور دراز علاقوں میں اعلی تعلیم کی سہولیات دینا بہت اہم ہے۔ اجلاس میں یہ بھی طے کیا گیا کہ محکمہ زراعت کے افسران پر مشتمل ایک کمیٹی تشکیل دی جائے گی ، کمیٹی ممبران سائٹ کا دورہ کر کے دس روز کے اندر رپورٹ پیش کریں گے تاکہ اٹک کیمپس کی جلد از جلد تکمیل کو یقینی بنایا جا سکے۔

اجلاس میں پرو وائس چانسلر پیر مہر علی شاہ ایرڈ ایگری کلچر یونیورسٹی راولپنڈی ڈاکٹر محمد نعیم، سپیشل سیکرٹری محکمہ زراعت ڈاکٹر شہنشاہ فیصل عظیم، ایڈیشنل سیکرٹری زراعت کیپٹن وقاص، گورنر سیکرٹریٹ سے پرنسپل سیکرٹری ٹو گورنر کیپٹن (ر)ثاقب ظفر، سپیشل سیکرٹری اکیڈیمکس عبدالرحمن،شاہ، ایڈیشنل سیکرٹری یونیورسٹیز طارق محمود ، اٹک سے تعلق رکھنے والے ممبر قومی اسمبلی شیخ آفتاب احمد اور دیگر افسران موجود تھے۔