شیعہ علما کونسل کے سربراہ علامہ ساجد علی نقوی کا ایرانی صدر ابراہیم رئیسی، وزیر خارجہ عبداللہیان و دیگر شخصیات کی شہادت پرگہرے دکھ کا اظہار

لاہور (اُردو پوائنٹ اخبارتازہ ترین - اے پی پی۔ 20 مئی2024ء) شیعہ علما کونسل کے سربراہ علامہ ساجد علی نقوی نے اسلامی جمہوریہ ایران کے صدر ابراہیم رئیسی، وزیر خارجہ عبداللہیان و دیگر شخصیات کی شہادت پرگہرے دکھ کا اظہار کرتے ہوئے کہا ہے کہ اس جانگداز حادثے پررہبر انقلاب اسلامی آیت اللہ العظمیٰ سید علی خامنہ ای کی خدمت میں تعزیت پیشں کرتے ہیں ۔

علامہ ساجد نقوی نے پیر کے روز یہاں جاری اپنے تعزیتی پیغام میں کہا کہ اسلامی جمہوریہ ایران کے صدر کی خطے میں امن قائم کرنے کےلئے خدمات ناقابل فراموش ہیں، ابراہیم رئیسی نے عالمی سطح پر غزہ کے مظلوم فلسطینیوں کے مسئلے کو اجاگر کیا، دکھ و غم کی اس گھڑی میں پاکستانی قوم ایرانی قوم کے ساتھ برابر کی شریک ہے ۔انہوں نے کہا کہ اسلامی جمہوریہ ایران کے صدر نے مسلم ممالک کے ساتھ بہتر تعلقات استوار کرنے اور باہمی اختلافات ختم کرنے کےلئے جرات مندانہ عملی اقدامات سمیت ان ممالک کے دورے کئے۔

(جاری ہے)

علامہ ساجد علی نقوی نے کہا کہ ہماری دعا ہے کہ اللہ تعالی اسلامی جمہوریہ ایران کے صدر سید ابراہیم رئیسی، تبریز کے امام جمعہ آیت اللہ محمد علی آل ھاشم ، وزیر خارجہ حسین امیرعبداللہیان، مشرقی آذربائیجان کے گورنر مالک رحمتی، جنرل سید مہدی رسول اور دیگر شخصیات کے سوگوار لواحقین کو صبر جمیل عطا فرمائے۔