اسلام آباد میں میوزیکل ایونٹ کے منتظمین کے خلاف مقدمہ درج

ہفتہ 25 نومبر 2023 18:17

اسلام آباد (اُردو پوائنٹ اخبارتازہ ترین - این این آئی۔ 25 نومبر2023ء) وفاقی دارالحکومت اسلام آباد میں گزشتہ رات ہونے والے میوزیکل ایونٹ کے آرگنائزرز کے خلاف تھانہ آبپارہ میں مقدمہ درج کرلیا گیا۔مقدمہ این او سی کی خلاف ورزی کرنے پر درج کیا گیا، ایف آئی آر کے مطابق میوزیکل ایونٹ کی انتظامیہ لاء اینڈ آرڈر اور قانون کو خاطر خاہ نہ لائی۔

اسلام آباد میں گزشتہ رات میوزیکل ایونٹ کا انعقاد کیا گیا تھا جس میں نامور گلوکاروں نے شرکت کی تھی۔این او سی کی خلاف ورزی کرنے پر ایونٹ انتظامیہ کے خلاف ایس ایچ او ناصر منظور کی مدعیت میں تھانہ آبپارہ میں مقدمہ درج کر لیا گیا۔مقدمے میں ایونٹ انتظامیہ کے عادل ایوب، عثمان عثمانی، عمران ، جنید عباسی اور دیگر کو نامز کیا گیا۔

(جاری ہے)

ایف آئی آر کے متن کے مطابق لاؤڈ اسپیکرز پر اونچی آواز میں میوزک بجایا جاتا رہا جس کی آواز شہری آبادی میں گونجتی رہی۔

اس کے ساتھ ساتھ این او سی کے مطابق سیکیورٹی اسٹاف فراہم نہیں کیا گیا جس سے ٹریفک کی روانی متاثر ہوتی رہی۔اسلام آباد پولیس نے ساؤنڈ سسٹم ، لائٹس، اسٹیج کا سامان اور دیگر چیزیں ضبط کر لیں۔ موقع پر موجود افراد کو گرفتار کر لیا گیا۔ ایونٹ انتظامیہ موقع سے فرار ہو گئی۔ گزشتہ رات شہریوں کی جانب سے آبپارہ چوک پر احتجاج بھی کیا گیا تھا۔