خیبرپختونخوا حکومت کا صحت کارڈ کی رقم 10 سے بڑھا کر 20 لاکھ روپے کرنے کا فیصلہ

پشاور ( اُردو پوائنٹ اخبارتازہ ترین۔ 21 مئی 2024ء ) خیبرپختونخوا حکومت نے صحت کارڈ کی رقم 10 سے بڑھا کر 20 لاکھ روپے کرنے کا فیصلہ کرلیا۔ پشاور میں تقریب سے خطاب کرتے ہوئے خیبر پختونخوا کے وزیر اعلیٰ علی امین گنڈاپور نے کہا کہ صحت کے شعبے میں ہم نے صحت کارڈ فراہم کیے ہیں، صوبائی حکومت صحت کارڈ کو مزید وسعت دے رہی ہے، صحت کارڈ کی رقم 10 سے بڑھا کر 20 لاکھ کی جائے گی، اس صحت کارڈ کے ذریعے خیبرپختونخوا کے شہری اپنے صوبے ہی نہیں بلکہ پاکستان بھر میں منظورشدہ ہسپتالوں سے مفت علاج کروا سکیں گے، صحت کے شعبے کو مزید بہتر کرنا چاہتے ہیں، صوبائی حکومت سرکاری ہسپتالوں میں صحت کی سہولیات کو بھی بہتر کرنا چاہتی ہے۔

انہوں نے کہا کہ ہم بہت سی چیزوں کی توقعات کر رہے ہیں، ابھی پاکستان اور ہمارا صوبہ مالیاتی مشکلات سے دوچار ہے، ہم خود مختار لوگ ہیں لیکن بدقسمتی سے ہمیں امداد لینا پڑ رہی ہے، خیبر پختونخوا میں امن و امان کی صورتحال ہمارے لیے چیلنج ہے، اس کے لیے ہمارے لوگوں اور ہماری افواج نے بہت قربانیاں دی ہیں، امن و امان کی صورتحال سے نمٹنے کے لیے پسماندہ علاقوں کو ترقی دینا ہوگی کیوں کہ امن و امان کی صورتحال کو بہتر بنانے کا واحد حل اپنے علاقوں کی ترقی ہے، امن و امان کو بہتر کرنے کے لیے لوگوں کو روزگار کے مواقع فراہم کرنا ہوں گے، اس کی مدد سے مستقبل قریب میں دہشت گردی کا خاتمہ کرنے میں بھی کامیاب ہوجائیں گے۔

(جاری ہے)

بتایا جارہا ہے کہ تحریک انصاف کی جانب سے 8 فروری کے الیکشن کے بعد خیبرپختونخواہ میں حکومت بنانے کے بعد صحت کارڈ سہولت کو بحال کرنے کا اعلان کیا گیا، صحت کارڈ منصوبے کی بحالی کے بعد اب تک ایک لاکھ افراد کا مفت علاج ہو چکا ہے ، رواں برس 8 فروری کے عام انتخابات کے بعد خیبرپختونخواہ میں تحریک انصاف کی صوبائی حکومت کے قیام کے بعد سے صوبے میں اب تک صحت کارڈ پر کیے گئے مفت علاج پرڈھائی ارب روپے سے زائد کی لاگت آئی، اس دوران صوبے میں ہی نہیں بلکہ ملک کے مختلف ہسپتالوں میں داخل خیبرپختونخواہ کے شہریوں کا بھی علاج کیا گیا ۔