وزیر اعلٰی بلوچستان میر سرفراز بگٹی کی زیر صدارت کوئٹہ سالڈ ویسٹ مینجمنٹ سے متعلق جائزہ اجلاس

کوئٹہ (اُردو پوائنٹ اخبارتازہ ترین - اے پی پی۔ 17 مئی2024ء) وزیر اعلی بلوچستان میر سرفراز بگٹی کی زیر صدارت کوئٹہ سالڈ ویسٹ مینجمنٹ سے متعلق جائزہ اجلاس جمعہ کو یہاں وزیر اعلی سیکرٹریٹ میں منعقد ہوا ۔ اجلاس میں صوبائی وزیر بلدیات سردار سرفراز چاکر ڈومکی ، چیف سیکرٹری بلوچستان شکیل قادر خان، وزیراعلی کے پرنسپل سیکرٹری عمران زرکون، سیکرٹری بلدیات عبدالروف بلوچ، سیکرٹری پلاننگ لعل جان جعفر، سپیشل سیکرٹری اسفندیار بلوچ، کمشنر کوئٹہ ڈویژن و ایڈمنسٹریٹر میٹروپولیٹن کارپوریشن حمزہ شفقات، پبلک پرائیویٹ پارٹنر شپ اتھارٹی کے سی ای او فیصل خان و دیگر متعلقہ حکام نے شرکت کی ۔

اجلاس کو کمشنر کوئٹہ ڈویژن ایڈمنسٹریٹر میٹروپولیٹن کارپوریشن حمزہ شفقات کی جانب سے بریفننگ دیتے ہوئے بتایا گیا کہ کوئٹہ شہر سے ڈیڑھ لاکھ ٹن کچرہ اٹھا لیا گیا ہے ، صفائی مہم دن رات دو شفٹوں میں جاری ہے ، تاریخ میں پہلی بار پشتون آبادی میں صفائی مہم شروع کی گئی جبکہ سٹی نالہ سے 80 فیصد کچرہ صاف کیا گیا ، ماہ اگست سے کچرہ اٹھانے کے عمل کو آئوٹ سورس کردیا جائے گا جس کے بعد شہر میں کچرے کے جابجا ڈھیر دیکھنے کو نہیں ملیں گے ۔

(جاری ہے)

میٹروپولیٹن کارپوریشن کے مستقل ملازمین کے علاوہ 1600 ملازمین ہیں جن کو ماہانہ 15000 روپے معاوضہ دیا جاتا ہے ، پبلک پرائیویٹ پارٹنر شپ کے بعد عارضی ملازمین کمپنی کی صوابدید پر ہوں گے جبکہ کارپوریشن کے مستقل ملازمین سے 58 نئے نواحی وارڈز کی میونسپل سروسز کا کام لیا جائے گا ۔ وزیر اعلٰی بلوچستان میر سرفراز بگٹی نے ایئر پورٹ روڑ کنٹونمنٹ بورڈ ایریا کو بھی صفائی مہم میں شامل کرنے کی ہدایت کرتے ہوئے کہا کہ شہر کو صاف ستھرا رکھنا ہم سب کی مشترکہ ذمہ داری ہے ، شہر سے روزانہ 1600 ٹن کچرہ اٹھانے کے لئے پبلک پرائیویٹ پارٹنر شپ کے جملہ امور کو تمام تر قانونی ضابطوں کے مطابق نمٹایا جائے تاکہ شہر میں صفائی ستھرائی کی استعداد کار میں مجوزہ تین گنا اضافہ ہوسکے ، اس سلسلے میں ٹینڈرنگ پراسس کے تمام تر عمل میں شفافیت اور میرٹ کو یقینی بنایا جائے۔

وزیر اعلی نے محکمہ خزانہ کو میٹروپولیٹن کارپوریشن کے ملازمین کی واجب الادا تنخواہوں اور پنشن کی فوری ادائیگی اور گزشتہ ادوار کے غیر معمولی فیول اخراجات کی جانچ پڑتال کا حکم دیا ۔ انہوں نے کہا کہ صفائی مہم میں گزشتہ دو ماہ کی کارکردگی نمایاں رہی تاہم اخراجات کا آڈٹ ضرور کرائیں گے ، محکمہ فنانس کی آڈٹ ٹیم گزشتہ دو ماہ کے اخراجات کا آڈٹ کرے گی جبکہ گزشتہ ادوار میں 70 کروڑ روپے کے فیول اخراجات کی تحقیقات اینٹی کرپشن اسٹیبلشمنٹ کرے گی ۔

وزیر اعلی میر سرفراز بگٹی نے کہا کہ عیدالاضحٰی پر جاری صفائی مہم میں تعطل کے بجائے تیزی لائی جائے ، عیدالاضحٰی پر میٹروپولیٹن کارپوریشن کے افسران و اہلکاروں کی چھٹیاں نہیں ہوں گی ، عید پر سب کام کریں گے میں خود بھی چھٹی نہیں کروں گا ۔ انہوں نے کہا کہ ایئر پورٹ روڈ شہر کا وہ مرکزی حصہ ہے جہاں سے بیرون ملک و دیگر شہروں سے مہمانوں کی آمد و رفت لگی رہتی ہے اس کنٹونمنٹ ایریا میں بھی میٹروپولیٹن کارپوریشن آج ہی سے صفائی مہم شروع کردے ، دیواروں کو صاف کرکے انہیں خوبصورتی سے ہم آہنگ کیا جائے اور یہاں مستقل صفائی کے لیے جامع اقدامات اٹھائے جائیں یہ شہر ہم سب کا ہے جس کی صفائی ستھرائی اور خوبصورتی بھی ہم سب کا فرض ہے وزیر اعلٰی میر سرفراز بگٹی نے کہا کہ اچھی کارکردگی کو سراہیں گے جبکہ کسی بھی کمی کوتاہی کی نشادہی پر اسے درست کیا جائے گا ۔