{بلوچستان کے قدرتی وسائل سے معاشی فوائد کی عوام کو منتقلی جاری

a کوئٹہ (اُردو پوائنٹ اخبارتازہ ترین - آن لائن۔ 26 مئی2024ء) بلوچستان کے قدرتی وسائل سے ہونے والے معاشی فوائد کی بلوچستان کے عوام کو منتقلی جاری ہے اورضلع ڈیرہ بگٹی اور سوئی کے لوگوں کیلئے وہاں سے نکلنے والی گیس سے صحت، تعلیم، روزگار، ہنر اور مختلف ترقیاتی منصوبوں کی صورت میں بے شمار منصوبے دیئے گئے ہیں۔ذرائع کے حوالے سے ایک رپورٹ کے مطابق پاک فوج اور ایف سی بلوچستان (نارتھ) کی جانب سے ان قومی پروجیکٹس کی حفاظت کے فرائض سرانجام دیے جارہے ہیں۔

حکومت بلوچستان اور پاکستان پٹرولیم لمیٹڈ (پی پی ایل L) کے اشتراک سے چلنے والا پبلک ویلفیئر ہسپتال، سوئی مقامی افراد کو صحت کی مفت سہولیات فراہم کر رہا ہے۔پی پی ایل کی جانب سے سوئی اور ڈیرہ بگٹی کے لوگوں کیلئے متعدد منصوبوں پر کام جاری ہے جن میں پبلک ویلفیئر ہسپتال سوئی کیلئے فنڈز کی فراہمی،مکمل سوئی ٹاؤن کو مفت پانی کی سپلائی،تعلیم فاونڈیشن کے اشتراک سے سوئی کے بچوں کو مفت تعلیمی سہولیات،سوئی کے نوجوانوں و عورتوں کو مختلف ہنر سیکھانے کیلئے ووکیشنل ٹریننگ انسٹیٹیوٹ کا قیام،ورچوئل یونیورسٹی، سوئی کیمپس کیلئے فنڈز کی فراہمی شامل ہے۔

(جاری ہے)

پاکستان پٹرولیم لمیٹڈ 1952 سے بلوچستان کے علاقے سوئی میں موجود ہے۔ جنرل مینیجر پاکستان پٹرولیم لمیٹڈکے مطابق پی پی ایل کی جانب سے سوئی میں مختلف فلاحی منصوبوں پر کام جاری ہے۔ پی پی ایل حکام کا کہنا ہے کہ سوئی میں پی پی ایل کی جانب سے پچھلے 5 سال کے دوران تعلیم کی مد میں 1500 میلین، صحت کیلئے 1000 میلین، سوئی ٹاؤن کو پانی کی فراہمی کیلئے 6000 میلین سے زائد کا خرچہ کیاگیا۔

قبائلی رہنما، سوئی نے بتایا کہ سوئی ویلفیئر ہسپتال میں مقامی افراد کا علاج فری ہو رہا ہے۔مینیجر ووکیشنل ٹریننگ انسٹیٹیوٹ، سوئی نے بتایا کہ ووکیشنل ٹریننگ انسٹیٹیوٹ پی پی ایل کے تعاون سے چل رہا ہے اور اس میں سوئی کے نوجوان مرد اور عورتوں کو مختلف ہنر سیکھائے جارہے ہیں۔ قبائلی رہنما، سوئی کے مطابق سوئی میں 80 تا 90 فیصد لوگوں کے پاس فری گیس موجود ہے۔ امن قائم کرنے میں پاک فوج اور ایف سی نے بہت قربانیاں دیں۔