غیر قانونی ہاؤسنگ سوسائٹیز کے خلاف بلا امتیاز کارروائیاں مزید تیز کی جائیں،کمشنر راولپنڈی ڈویژن

راولپنڈی (اُردو پوائنٹ اخبارتازہ ترین - اے پی پی۔ 17 مئی2024ء) کمشنر راولپنڈی ڈویژن انجینئر عامر خٹک نے ہدایت کی کہ غیر قانونی ہاؤسنگ سوسائٹیز کے خلاف بلا امتیاز کارروائیاں مزید تیز کی جائیں۔ کمشنر نے کہا کہ غیر قانونی ہاؤسنگ سوسائیٹز نہ صرف معصوم عوام کی محنت کی کمائی کو داؤ پر لگاتے ہیں بلکہ ماحولیاتی تباہی کا باعث بھی بنتے ہیں جسکو روکنے کے لئے ٹھوس اقدامات کی ضرورت ہے۔

آر ڈی اے کی طرف سے بریفنگ میں بتایا گیا کہ راولپنڈی میں 635 ہاؤسنگ سکیمز ہیں جن میں سے 104 منظور شدہ, 96انڈر پروسیس جبکہ باقی کے خلاف کارروائی جاری ہے۔کمشنر آفس راولپنڈی میں منعقدہ اس اجلاس میں ڈپٹی کمشنر حسن وقار چیمہ، ایڈیشنل کمشنر کوآرڈینیشن سید نذارت علی، ڈائریکٹر جنرل راولپنڈی ڈویلپمنٹ اتھارٹی کنزی مرتضیٰ، ڈائریکٹر فاٹا و دیگر متعلقہ افسران نے شرکت کی۔

(جاری ہے)

کمشنر راولپنڈی نے مزید کہا کہ عوام کو کھانے پینے کی معیاری اشیاء فراہم کرنے کے لئے فوڈ ڈیپارٹمنٹ اپنی چیکنگ مزید بہتر کرے۔ کھانے پینے کی جگہوں پر صفائی اور حفظان صحت کے اصولوں پر عمل یقینی بنایا جائے۔ محکمہ صحت نے بریفنگ دیتے ہوئے کہا کہ یکم مئی 2024 سے اب تک 1998چھاپوں کے دوران 864کو امپروومنٹ نوٹس اور 53 لاکھ 62 ہزار کا جرمانہ عائد اور 02 ایف آئی آرز رجسٹر کی گئی۔\378