بچیوں کیلئے کم از کم معیار تعلیم انٹرمیڈیٹ تک ہونا چاہیے تاکہ زندگی کے مسائل حل کرنے کا شعورہو،سی او ہیلتھ سرگودھا

سرگودھا(اُردو پوائنٹ اخبارتازہ ترین - این این آئی۔ 18 مئی2024ء) سرگودھا میں کم عمرکی شادیوں کے بڑھتے ہوئے رحجان کی روک تھام کیلئے منعقدہ ورکشاپ میں سی ای او ہیلتھ سرگودھا ڈاکٹر اسلم اسد نے کہاہے کہ بچیوں کے لئے کم از کم معیار تعلیم انٹرمیڈیٹ تک ہونا چاہیے تاکہ انہیں زندگی گزارنے، رشتے نبھانے اور زندگی کے مسائل حل کرنے کا شعور ہو۔ تفصیلات کے مطابق سی ای او ہیلتھ ڈاکٹر اسلم اسد نے رورل ہیلتھ سنٹر جھاوریاں میں کم عمر شادیوں کے رحجان کی روک تھام کے لئے منعقدہ ورکشاپ میں لیڈی ہیلتھ ورکرز کو خاندانی منصوبہ بندی پر آگاہی مہم تیز کرنے کی ترغیب دیتے ہوئے کہاکہ آبادی کی بڑھتی ہوئی رفتار سے پاکستان دنیا کا آبادی کے لحاظ سے پانچواں ملک ہے اور اس کی وجہ یہاں کم عمر کی شادیوں کا بڑھتا ہوا رجحان ہے۔

(جاری ہے)

اس موقع پر کنسلٹنٹ قیصرہ اسماعیل نے کہا کہ ایک صحت مند ماں ہی صحتمند معاشرہ تخلیق کرسکتی ہے جس کے لیے ضروری ہے کہ بچیوں کی کم عمری میں شادی سے پرہیز کیا جائے۔ انہوں نے بتایا کہ پنجاب میں کم پڑھے لکھے خاندانوں میں بچیوں یا بچوں کی شادی بہت کم عمر میں کرنے کا رواج ہے جس سے والدین اور کمسن میاں بیوی دونوں صحت و معیشت کے متعدد مسائل کا شکار رہتے ہیں۔

اس سے پیدا ہونے والے بچوں کی صحت، تعلیم اور نشوونما بھی متاثر ہوتی ہے۔تحصیل شاہپور کے ڈپٹی ڈی ایچ اوشاہپور ڈاکٹر عدنان اصغر، میڈیکل آفیسر ڈاکٹر مختار، پاپولیشن آفیسر بھلوال رانا قیصر اور ریٹائرڈ ڈائریکٹر فشریز مہر محمد اسماعیل نے بھی کم عمر شادیوں کے رحجان اور اس کے صحت و معاشرتی مسائل اور ان کے تدارک کے لئے خاندانی منصوبہ بندی کے فروغ پر زور دیا۔