سوات،سیاحتی مقامات پر حفاظتی اقدامات مزید سخت، غیر قانونی زپ لائنز اور بوٹنگ کیخلاف کارروائی کا فیصلہ

سوات (اُردو پوائنٹ اخبارتازہ ترین - این این آئی۔ 02 جولائی2026ء) ضلع سوات اور بر سوات میں سیاحوں کی بڑھتی ہوئی آمد کے پیش نظر سیاحتی مقامات پر سیکیورٹی، حفاظتی انتظامات اور ہنگامی صورتحال سے نمٹنے کیلئے ڈپٹی کمشنر بر سوات سہیل احمد خان کی زیر صدارت اعلی سطحی اجلاس منعقد ہوا، جس میں ڈسٹرکٹ پولیس آفیسر محمد عمر، ایڈیشنل ڈپٹی کمشنرز، اپر سوات ڈویلپمنٹ اتھارٹی، ریسکیو 1122، اسسٹنٹ کمشنرز اور دیگر متعلقہ محکموں کے افسران نے شرکت کی۔

اجلاس میں فیصلہ کیا گیا کہ تمام سیاحتی مقامات کی رسک کیٹیگرائزیشن کرکے ہر مقام کیلئے الگ حفاظتی پلان تیار کیا جائے گا، تربیت یافتہ اہلکار، ریسکیو آلات، لائف سیونگ ایکوپمنٹ اور طبی سہولیات ہر وقت دستیاب رکھی جائیں گی، جبکہ معلوماتی اور وارننگ سائن بورڈز بھی نصب کیے جائیں گے۔

(جاری ہے)

اجلاس میں غیر قانونی، غیر محفوظ اور بغیر این او سی چلنے والی زپ لائنز اور بوٹنگ سرگرمیوں کے خلاف فوری کارروائی اور انہیں سیل کرنے کا فیصلہ بھی کیا گیا۔

ریسکیو 1122کو مکمل الرٹ رہنے، جبکہ سوات پولیس کو دریاں اور آبی مقامات پر نافذ دفعہ 144 پر سختی سے عملدرآمد اور خلاف ورزی کرنے والوں کے خلاف قانونی کارروائی کی ہدایت کی گئی۔ اجلاس میں اس عزم کا اعادہ کیا گیا کہ ضلعی انتظامیہ، پولیس، ریسکیو 1122اور دیگر ادارے باہمی تعاون سے سیاحوں کے جان و مال کے تحفظ اور محفوظ سیاحت کو ہر صورت یقینی بنائیں گے۔