Hamla Khawateen Aur Jild Ki Siyahi - Article No. 3175

حاملہ خواتین کی جلد حمل کے اوائل ہفتوں سے خشک و پژمردہ ہونا شروع ہو جاتی ہے۔یہ صورتحال حمل کے آخری ہفتوں میں بعض اوقات اس حد تک پریشان کن ہو سکتی ہے کہ جلد پر حد درجہ خشکی کے باعث سرخ و سیاہ چکتے نما دھبے پڑنے لگتے ہیں اور جلد کی رنگت سیاہی مائل ہونے لگتی ہے۔بعض خواتین کے پیٹ کی جلد کی رنگت بھی نیلگوں مائل ہو جاتی ہے۔اس کی وجہ معالجین کے مطابق یہ ہے کہ ”چونکہ حاملہ کے وجود میں ایک نئے وجود کی تشکیل ہو رہی ہوتی ہے جس کے لئے اُسے اضافی غذائیت کے ساتھ کثیر مقدار میں ماں کے جسم میں بننے والی قدرتی رطوبتوں کی بھی ضرورت ہوتی ہے تاکہ یہ ننھا منا پروان چڑھنے والا وجود بیرونی جراثیموں اور ضرر رساں اثرات سے ان رطوبتوں میں سمٹے ہوئے محفوظ رہ سکے۔
لہٰذا ان تمام وجوہات کی بناء پر حاملہ کے جسم کے بے نالی غدوں (Endocrine Glands) کی فعالیت میں نمایاں کمی آ جاتی ہے جو مجموعی طور پر جلد کی خشکی کی صورت میں سامنے آتی ہے۔

(جاری ہے)

اس کے علاوہ حاملہ کے پیٹ کی جلد کی رنگت کے نیلگوں مائل ہونے کا سبب بھی پیٹ میں نمو پانے والے جینین (Embryo) کے خون کی باقاعدہ رسد کے لئے پیٹ پر قدرتی طور پر اُن شریانوں کا پیدا ہونا ہے جو ماں کے شریانی نظام سے تکسیدہ شدہ (Oxygenated Blood) صاف خون جینین (Embryo) کی نشوونما کے لئے فراہم کرتا ہے۔

لہٰذا ایسی حاملہ خواتین جو دورانِ حمل جلد کی سیاہی کے مسئلے کا سامنا کر رہی ہیں اُنہیں چاہیے اپنی جلد کی نگہداشت کے لئے قدرتی ذرائع کا استعمال کریں۔مصنوعی طریقوں اور کیمیکلز سے تیار شدہ کریمز اور بلیچ وغیرہ کا جلد پر استعمال اس مسئلے کو مزید بگاڑ سکتا ہے۔
غذا میں تازے پھل‘کچی سبزیوں کے ساتھ ساتھ ریشہ دار (Fiber) آئرن‘کاربوہائیڈریٹ اور کچھ کم مقدار میں پروٹین پر مشتمل غذاؤں کا استعمال بھی حاملہ کی مجموعی صحت اور جلد کی حفاظت کے سلسلے میں اہم کردار ادا کرتا ہے۔اس کے ساتھ ساتھ دودھ‘شہد اور مناسب مقدار میں معالج کے مشورے سے پھلوں کے رس کا استعمال بھی مفید رہتا ہے۔جلد کی سیاہی اور گدلا پن دور کرنے کے لئے 4 کھانے کے چمچے دہی میں 2 چٹکی ہلدی پاؤڈر‘1 چٹکی صندل پاؤڈر 1 چائے کا چمچہ شہد اور چند قطرے عرق گلاب کا آہستگی سے مساج کرنے سے جلد کی سیاہی میں کمی آتی ہے۔اس کے علاوہ نارنگی کے چھلکوں کو چھاؤں میں خشک کر کے پیس لیں اور کچے دودھ میں ملا کر جلد کے خشک حصوں پر ملنے سے بھی جلد نرم و ملائم ہو جائے گی۔1 کپ ناریل کے تیل میں 1 چائے کا چمچہ زعفران ملا کر رات بھر رکھیں۔صبح غسل کے بعد اس تیل سے جلد پر مالش کیجئے اور اسے جلد پر لگے رہنے دیں اور رات کو سونے سے قبل دوبارہ اسی تیل سے جلد پر مالش کریں۔دوسرے دن غسل کے بعد بھی یہی عمل انجام دیں۔کچھ ہی دنوں میں آپ کی جلد کی سیاہی و خشکی میں نمایاں کمی واقع ہو گی۔