Acne Se Mutasir Jild Ke Liye Face Mask - Article No. 3204

کیا آپ کا شمار بھی ان خواتین یا لڑکیوں میں ہوتا ہے جو اپنے چہرے پر نکلنے والے دانوں اور کیل مہاسوں کی وجہ سے پریشان رہتی ہیں کیونکہ ایک عام تاثر یہی ہے کہ ایسی جلد کی حامل خواتین کوئی بھی فیس ماسک یا اسکرب استعمال کریں گی تو یہ ان کے مسئلے کی شدت میں اضافہ کر کے جلد کی حالت کو مزید ابتری کی طرف مائل کر دیں گے لیکن یہ محض ایک مفروضہ ہے کچھ اقسام کے فیس ماسک اور اسکرب ایسے بھی ہیں جنہیں اپنی جلد پر استعمال کر کے آپ اپنی مرجھائی ہوئی اور بے رونق جلد پر اک حسین سویرا اور درخشاں چمک بکھیر سکتی ہیں بس شرط یہ ہے کہ یہ آپ کے دانوں یا کیل مہاسوں میں کسی قسم کے بگاڑ یا اضافے کا سبب نہ بنیں۔اس کے لئے آپ کو بے حد محتاط ہو کر نرم و ملیح اساس کے حامل ماسک یا اسکرب کا انتخاب کرنا ہو گا۔

(جاری ہے)

تسکین آمیز جئی کے دلیے کو ٹھنڈے دہی اور خالص صندل کے پیسٹ میں مکس کر کے اس پیسٹ کو اپنے چہرے پر پھیلا لیں۔ایک گھنٹے کے بعد تازے پانی سے چہرہ دھو کر صاف کر لیں۔حساس جلد کے لئے ہلدی اور دہی کا ماسک بہترین ہے یہ جلد کو تسکین اور ٹھنڈک دونوں کا احساس مہیا کرتا ہے۔

بلیک ہیڈز اور چکنی جلد کے مسائل سے نجات پانے کے لئے کریلے کے ماسک سے مدد لی جا سکتی ہے۔کریلے کے جوس کو کدوکش کیے ہوئے کھیرے کے ساتھ مکس کریں۔(وٹامنز اور منرلز کی خوبیوں سے لبریز اور ضد سوزش خصوصیات کا حامل ہونے کی وجہ سے کریلے کا جوس جلد میں قدرتی چکنائی کے توازن کو برقرار رکھتا ہے) اس ماسک کو چہرے پر لگائیں 30 منٹ کے بعد ٹھنڈے پانی سے چہرہ دھو لیں اور قدرتی ہوا میں خشک ہونے دیں۔ہفتے میں دو مرتبہ اس ماسک کا استعمال خوشگوار نتائج دے گا۔