Tomato Laye Dilkashi Aur Kare Sehat Bahal Bhi - Article No. 3162

صحت کی بحالی کا مسئلہ ہو یا جلد کی حفاظت کا وٹامن C نمکیات اور وٹامن A پر مشتمل یہ سبزی بے حد کارآمد ہے۔کچھ ملکوں میں ٹماٹر پھل کی طرح کھایا جاتا ہے بہرحال یہ صحت کے لئے مفید ہے۔
ٹماٹر جلد کی حفاظت میں اپنی ٹھنڈک اور سیکٹرنے والی خوبیوں کی بدولت اہم کردار ادا کرتا ہے۔اس میں موجود وٹامن C واضح دھبوں اور کیل مہاسوں کے نشانات دور کرنے میں مدد دیتا ہے۔یہ اینٹی آکسیڈنٹ بھی ہے جو جلد کے خلاف کام کرنے والے جراثیم سے مقابلہ کرتے ہیں۔
ٹماٹر اور لیموں
تازہ ٹماٹر کے ایک چمچ جوس میں دو سے چار قطرے تازہ لیموں کا رس شامل کر لیں۔اب اس مکسچر کو ایک کاٹن کی بال کی مدد سے چہرے پر لگائیں۔15 منٹ بعد سادہ پانی سے چہرہ دھو لیں اور عرق گلاب کی پھوار لے لیں یا موئسچرائزر لگا لیں۔

(جاری ہے)

کیل مہاسوں کے لئے
ایک نرم،تازہ اور اچھی حالت والے ٹماٹر کا گودا نکال لیں۔ایک گھنٹے تک اسی گودے کو چہرے پر لگا رہنے دیں سوکھ جائے تو سادہ پانی سے ہلکا سا رگڑ کر چہرہ دھو لیں۔کم از کم ایک ہفتے تک روزانہ یہ عمل جاری رکھیں۔
ٹماٹر اور ایوا کاڈو کا ماسک
یہ ماسک ملی جلی جلد والوں کے لئے بہترین ہے کیونکہ اس میں چیزوں کو سیکٹرنے کی صلاحیت ہوتی ہے۔اس ماسک میں وٹامن A,C اور E ہوتے ہیں اور یہ سکون و فرحت کا احساس دیتے ہیں۔اس ماسک کو بنانے کے لئے ایک چھوٹا ٹماٹر اور چھوٹا ایوا کاڈو لے کر گرائنڈ کر لیں اور اس گودے کو 20 سے 30 منٹ تک چہرے،گردن،جسم کے دیگر کھلے حصوں ں پر لگائیں۔پیروں پر بھی لگایا جا سکتا ہے۔30 منٹ بعد چہرہ دھو لیں۔فرق صاف ظاہر ہو گا۔
ٹماٹر فیشل کیا جا سکتا ہے
ایک ٹماٹر کو آدھا کاٹ لیں۔معمول کی کلینزنگ کر لیں اس کے بعد کچھ دیر ٹھہریں اور ٹماٹر کو چہرے پر مل لیں اور متاثرہ حصوں پر بار بار لگائیں اور سوکھنے کے بعد تھوڑی دیر اور نم کریں۔اس کے بعد سادہ پانی سے چہرہ دھو کر نرم ٹشو پیپر سے صاف کر لیں۔روغنی جلد والوں کے لئے یہ سادہ سا فیشل قدرتی شادابی لوٹائے گا اور اضافی چکناہٹ بھی دور ہو جائے گی۔
ٹماٹر کا Astringent
قدرتی اسٹرنجنٹ تیار کرنے کے لئے ٹماٹر کا جوس نکال لیں پھر اس میں کش کیا ہوا کھیرا ملا لیں اور کچھ قتلے بڑے رکھ لیں۔کھیرے کے ان قتلوں کو ٹماٹر کے جوس میں ڈبو کر چہرے پر رگڑ لیں۔کچھ دیر بعد سادے پانی سے چہرہ دھو لیں۔روزانہ کریں اور بہتر نتائج پائیں۔
ٹماٹر اور دہی کا ماسک
آدھا ٹماٹر کاٹ کر دو کھانے کے چمچ دہی میں ملا لیں۔ٹماٹر کچل لیں اور اس آمیزے کو چہرے پر لگائیں۔30 منٹ بعد نیم گرم پانی سے دھو لیں۔یہ سادہ سا ماسک چہرے کی دلکشی اور رعنائی کو حیرت انگیز طور پر بڑھا دے گا۔
ٹماٹر سے کلینزنگ
ٹماٹر اور دودھ کے تیار کردہ اس کلینزنگ سے جلد کی بہترین صفائی ہوتی ہے۔دودھ میں شامل Lectic Acid اور ٹماٹر میں شامل فروٹ ایسڈ کا امتزاج نرمی سے عمل کرتا ہے۔ٹماٹر کو بلینڈ کر کے چھان لیا جائے اور چھانے ہوئے رس میں برابر مقدار میں دودھ ملا لیں۔اب اسے چہرے اور گردن پر لگائیں۔10 منٹ تک سوکھنے دیں پھر سادے پانی سے دھو لیں۔اسی طرح ٹماٹر کے گودے کو ہلدی یا ملتانی مٹی سے ملا کر بھی ماسک بنایا جا سکتا ہے جسے مسلسل استعمال کرنے سے جلد کی گہرائی تک صفائی بھی ہوتی ہے اور جلد کی بے رونقی بھی ختم ہوتی ہے۔