مشرقی یوکرین میں روس نواز علیحدگی پسندوں نے یوکرین کا جنگی طیارہ مار گرایا ‘ 10شہری ہلاک ‘متعدد زخمی

پیر 18 اگست 2014 12:54

کیف(اُردو پوائنٹ اخبار تازہ ترین۔18اگست۔2014ء) مشرقی یوکرین میں روس نواز علیحدگی پسندوں نے یوکرین کا جنگی طیارہ مار گرایا جبکہ جھڑپوں میں 10 شہری ہلاک اور متعدد زخمی ہو گئے۔

(جاری ہے)

یوکرین کی فوج کے مطابق مگ 29 طرز کے اس طیارے کو لوہانسک میں مار گرایا گیا جبکہ طیارے کا پائلٹ ایجیکشن سیٹ کے ذریعے اپنی جان بچانے میں کامیاب ہو گیا، دونیسک سٹی کونسل کی جانب سے بیان میں کہا گیا کہ گزشتہ 24 گھنٹوں میں یوکرین کی سرکاری فورسز کی جانب سے دونیسک میں فوجی کارروائی کے دوران اب تک 10 شہری ہلاک اور8 زخمی ہو چکے ہیں، مقامی رہائشیوں کا کہنا ہے کہ سرکاری فورسز کی جانب سے رہائشی علاقوں پر بھاری ہتھیاروں سے حملوں کا سلسلہ جاری ہے۔

آرٹلری شیلنگ سے درجنوں رہائشی عمارتوں کو نقصان پہنچا جبکہ 50 ٹرانسفارمر اسٹیشن تباہ ہوگئے جس سے بجلی کا نظام بھی درہم برہم ہوگیا، جنوب مشرقی یوکرین میں اب تک کی جنگ میں 1400سے زائد افراد ہلاک اور 4 ہزار سے زائد زخمی ہوئے ہیں، ہلاک ہونے والوں میں2600 سویلین اور 29 بچے شامل ہیں، یوکرین کے وزیر خارجہ پاویل کلی مکین نے یورپی یونین اور مغربی دفاعی اتحاد نیٹو سے فوجی مدد فراہم کرنے کی درخواست کی ۔