وزیر اعظم سمیت پوری قوم کسی بھی قیمت پر دہشت گردی کو قبول نہیں کریگی، سینیٹر عبدالقیوم

اسلام آباد (اُردو پوائنٹ اخبارتازہ ترین - این این آئی۔ 16 فروری2017ء) مسلم لیگ )ن) کے سینیٹرلیفٹیننٹ جنرل(ر) عبدالقیوم نے کہا ہے کہ وزیر اعظم محمد نواز شریف سمیت پوری قوم کسی بھی قیمت پر دہشت گردی کو قبول نہیں کریگی،افغانستان ، پاکستان کے درمیان سرحدی نظام مزید منظم کرنے کی ضرورت ہے، بھارت دہشت گردی سے ایک قدم پیچھے ہٹنے کو تیار نہیں، وہ پاکستان کو غیر مستحکم کرنے کے اپنے ارادوں میں کبھی کامیاب نہیں ہوگا۔

ایک انٹرویو میں انھوں نے کہا کہ مسلم لیگ (ن) کی حکومت ، سکیورٹی فورسز اور پوری قوم دہشتگردی کے خاتمہ کیلئے متحد ہے اور اپنے ملک کو دہشتگردوں کے حوالے نہیںہونے دیں گے۔ انھوں نے کہا کہ پاک افواج نے پاکستان سے دہشت گردوں کا نیٹ ورک، ان کے ٹھکانوں اور مواصلات کے نظام کو مکمل طور پر تباہ کردیا ہے اور افغانستان کی کمزوری کی وجہ سے کچھ دہشتگرد وہاں موجود ہیں اور سرحد پار کر کے پاکستان میں داخل ہو جاتے ہیں جس کے باعث اکا دکا واقعات رونما ہو جاتے ہیں انھوں نے کہا کہ دونوں ملکوں کے درمیان سرحدی نظام کو مذید منظم کرنے کی اشد ضرورت ہے۔

(جاری ہے)

انہوں نے کہا کہ پاکستان سے دہشت گردی کا 80 فیصد خاتمہ کیا جاچکا ہے اور ہماری حکومت اور سکیورٹی فورسز اس کے مکمل خاتمے کے لئے پر عزم ہیں۔ بھارتی رویے کے حوالے سے گفتگو کرتے ہوئے انھوں نے کہا کہ بھارت دہشتگردی سے ایک قدم بھی پیچھے ہٹنے کو تیار نہیں وہ پاکستان کو غیر مستحکم کرنا چاہتا ہے اور وہ اپنے ارادوں میں کبھی بھی کامیاب نہیں ہوگا۔

افغانستاں کے حوالے سے پوچھے گئے سوال کا جواب دیتے ہوئے انھوں نے کہا کہ پاکستان کے عوام افغان قوم سے محبت رکھتے ہیں اور یہی وجہ ہے کہ لاکھوں افغان مہاجرین پاکستان میں پناہ لئے ہوئے ہیں اور پاکستان میں ہر قسم کا کاروبار بھی کر رہے ہیں ۔ انھوں نے کہا کہ افغانستان کو دہشتگردی کے خاتمہ کے لئے سرحدی تنازعات اور اپنے اندرونی حالات کو بہتر بنانے کی ضرورت ہے۔