جسٹس ثاقب نثار نے حدیبیہ کیس کی دوبارہ سماعت کیلئے نیا بینچ تشکیل دیدیا

جسٹس مشیرعالم کی سربراہی میں 3 رکنی بینچ 28 نومبر سے کیس کی سماعت کرے گا

ہفتہ 25 نومبر 2017 13:10

اسلام آباد(اُردو پوائنٹ اخبارتازہ ترین - آئی این پی۔ 25 نومبر2017ء) چیف جسٹس پاکستان جسٹس ثاقب نثار نے حدیبیہ کیس کو دوبارہ سماعت کے لیے مقرر کرتے ہوئے نیا بینچ تشکیل دے دیا ، بینچ 28 نومبر کو دن 12 بجے کیس کی سماعت کرے گا۔ تفصیلات کے مطابق چیف جسٹس پاکستان جسٹس ثاقب نثار نے حدیبیہ پیپرز ملز کیس کھولنے سے متعلق نیب کی اپیل پر سماعت کے لیے جسٹس مشیرعالم کی سربراہی میں 3 رکنی خصوصی بینچ تشکیل دیدیا ہے جو 28 نومبر کو دن 12 بجے کیس کی سماعت کرے گا۔

نئے بینچ میں جسٹس قاضی فائزعیسی اور جسٹس مظہر عالم میاں خیل شامل ہیں۔

(جاری ہے)

یہ تینوں ججز پاناما بینچ میں شامل نہیں تھے۔اس سے پہلے جسٹس آصف سعید کھوسہ نے پاناما بینچ کا حصہ ہونے کے باعث حدیبیہ کیس سننے سے انکار کرتے ہوئے کہا تھا کہ رجسٹرار آفس نے کیس غلطی سے بینچ کے سامنے لگا دیا اور شائد رجسٹرار آفس نے پاناما کیس پر میرا فیصلہ نہیں پڑھا، اپنے فیصلے میں حدیبیہ کیس کھولنے کے حوالے سے ایک حد تک فیصلہ دے چکا ہوں، رجسٹرار آفس کو کیس ہمارے بینچ کے سامنے نہیں لگانا چاہیے تھا۔واضح رہے کہ قومی احتساب بیورو (نیب)نے شریف فیملی کے خلاف حدیبیہ پیپرز ملز مقدمے کو دوبارہ کھولنے کے لیے سپریم کورٹ میں اپیل دائر کی تھی۔