منشیات ایک ناسور ہے جو ہماری نسل کو دیمک کی طرح کھا رہا ہے، ڈویژنل کمشنر حیدرآباد

منشیات فروشوں کے خلاف سخت سے سخت کارروائی کر کے منشیات کو جڑ سے ختم کیا جائے تاکہ ہم اپنی آئندہ نسل کو اس ناسور سے محفوظ رکھ سکیں

جمعہ 15 دسمبر 2017 21:03

حیدرآباد(اُردو پوائنٹ اخبارتازہ ترین - این این آئی۔ 15 دسمبر2017ء) ڈویژنل کمشنر حیدرآباد سعید احمد منگنیجو نے کہا ہے کہ منشیات ایک ناسور ہے جو ہماری نسل کو دیمک کی طرح کھا رہا ہے، اس لیے منشیات فروشوں کے خلاف سخت سے سخت کارروائی کر کے منشیات کو جڑ سے ختم کیا جائے تاکہ ہم اپنی آئندہ نسل کو اس ناسور سے محفوظ رکھ سکیں۔وہ شہباز ہال حیدرآباد میں ڈویژنل نارکوٹکس کمیٹی کے اجلاس کی صدارت کررہے تھے، اس موقع پرڈویژن کے تمام ڈپٹی کمشنرز ، ایکسائز ، ایجوکیشن ، پولیس سمیت دیگر متعلقہ محکموں کے افسران نے شرکت کی، اجلاس میں تمام اضلاع کی کارکردگی پر بحث کی گئی ۔

(جاری ہے)

سعید احمد منگنیجو نے اجلاس سے خطاب کرتے ہوئے کہا کہ 2010ء میں اینٹی نارکوٹکس ایکٹ پاس کیا گیا تھا جس کے تحت مذکورہ کمیٹیاں تشکیل دی گئی تھیں،انہوں نے بتایا کہ مذکورہ ایکٹ کے تحت عوام الناس میں منشیات کے نقصانات سے متعلق آگاہی فراہم کرنا شامل ہے، انہوں نے کہا کہ تمام اضلاع کے ہسپتالوں میں منشیات کے عادی مریضوں کے لیے علیحدہ وارڈ کا انتظام بھی کیا جائے تاکہ منشیات کے مریضوں کا احسن طریقے سے علاج ممکن ہو سکے، انہوں نے متعلقہ افسران کو ہدایت کی کہ وہ شراب خانوں کی سخت نگرانی کریںجبکہ مین پوری اور گٹکا فروشوں کے خلاف کارروائی کی جائے، انہوں نے متعلقہ افسران کو ہدایت کی کہ وہ 15 روز کے اندر اپنی کارکردگی رپورٹ پیش کریں ۔