ملک کی ممتاز شخصیت اور نظریہ پاکستان فورم کے صدر میاں عبدالکریم انتقال پا گئے

فیصل آباد۔16 اپریل(اُردو پوائنٹ اخبارتازہ ترین - اے پی پی۔ 16 اپریل2018ء) ملک کی ممتاز سیاسی ، سماجی ، عوامی شخصیت ،تحریک پاکستان کے سرگرم رہنماء اور نظریہ پاکستان فورم کے صدر میاں عبدالکریم مختصر علالت کے بعد پیر کی صبح اپنے خالق حقیقی سے جا ملے۔مرحوم کی نماز جنازہ بڑے قبرستان غلام محمد آباد میں ادا کی گئی جس میں ارکان اسمبلی ، منتخب بلدیاتی نمائندگان ، انتظامی افسران ، وکلاء ، علماء صحافیوں ، دانشوروں ، تاجروں ، صنعتکاروں ، اساتذہ اور سول سوسائٹی کے ہر مکتبہ فکر سے تعلق رکھنے والے ہزاروں افراد نے شرکت کی۔

بعد ازاں مرحوم و مغفور کو اشک بار آنکھوں کے ساتھ مذکورہ قبرستان میں ان کے آبائو اجداد کی آخری آرام گاہوں کے ساتھ سپرد خاک کر دیا گیا۔مرحول نے تحریک پاکستان ، نظریہ پاکستان ورکرز ٹرسٹ اور نظریہ پاکستان فورم کیلئے گراں قدر خدمات سر انجام دیں۔

(جاری ہے)

دریں اثناء صوبائی وزیر قانون پنجاب رانا ثناء اللہ خان ، وفاقی وزرائے مملکت حاجی محمد اکرم انصاری ، چوہدری عابد شیر علی ، طلال بدر چوہدری ، رانا محمد افضل خان، چیئر مین ضلع کونسل فیصل آباد چوہدری زاہد نذیر ،میئر میونسپل کارپوریشن فیصل ا ٓباد محمد رزاق ملک،کمشنر فیصل آباد مومن آغا ، ڈپٹی کمشنر فیصل آباد سلمان غنی اور دیگر اہم شخصیات نے مرحوم و مغفور کی ناگہانی وفات حسرت آیات پر گہرے دکھ ، دلی رنج و غم اور افسوس کا اظہار کیا ہے۔

مرحوم کے پسماندگان کے ساتھ تعزیت کا اظہار کرتے ہوئے انہوںنے میاں عبدالکریم مرحوم کیلئے مغفرت اور پسماندگان کیلئے صبر جمیل کی دعا بھی کی ۔