نئے اسلام آباد ائیرپورٹ کے افتتاح کی تاریخ سے متعلق نیا اعلان کردیا گیا

پیر 16 اپریل 2018 19:19

اسلام آباد ۔ (اُردو پوائنٹ اخبارتازہ ترین - اے پی پی۔ 16 اپریل2018ء)ایوی ایشن ڈویژن نے واضح کیا ہے کہ نیو اسلام آباد انٹر نیشنل ایئر پورٹ پر20 اپریل سے قومی و بین الاقوامی پروازوں کی آمدورفت شروع ہوجائے گی ،ڈویژن نے کسی بھی محکمے کو آپریشن موخر کرنے کی ہدایات جاری نہیں کیں ۔

(جاری ہے)

ترجمان ایوی ایشن ڈویژن نے نیو اسلام آباد انٹرنیشنل ایئرپورٹ پر پروازوں کی آمدورفت کی تاخیر کے حوالے سے میڈیا پر چلنے والی خبروں کی تردید کرتے ہوئے کہا ہے کہ ایئرپورٹ پر 20 اپریل سے اندرون و بیرون ملک پروازوں کا عمل باقاعدہ شروع کر دیا جائے گا۔

انہوں نے کہا کہ نیو ایئر پورٹ پر آپریشن کو موخر کرنے کے حوالے سے کسی بھی محکمے کو کسی قسم کی کوئی ہدایات جاری نہیں کی گئیں۔ نیو اسلام آباد ایئر پورٹ پاکستان کا سب سے بڑا گرین فیلڈ ایئرپورٹ ہے جس پر پروازوں کا عمل شروع کرنے کے لئے ایئرپورٹ پر تمام تیاریاں مکمل کر لی گئی ہیں۔ بین الا قوامی و جدید معیار کے مطابق سہولیات سے آراستہ نیو ایئرپورٹ پر مسافروں کو تمام تر سہولیات مہیا کی جا سکیںگی۔ نیو اسلام آباد انٹرنیشنل ائیر پورٹ 20 اپریل کو مکمل طور پر آپریشنل کر دیا جائے گا۔