وفاقی وزیر احسن اقبال کی زیر صدارات سالانہ ترقیاتی منصوبہ کی تعاون کمیٹی کا اجلاس

اسلام آباد ۔ (اُردو پوائنٹ اخبارتازہ ترین - اے پی پی۔ 16 اپریل2018ء) وفاقی وزیر منصوبہ بندی احسن اقبال کی جانب سے اعلی تعلیم کے لئے ہائر ایجوکیشن کمیشن کے لیے تجویز کردہ 35 ارب کے بجٹ کو بڑھا کر 45 ارب روپے کر دیا گیا ہے۔ پیر کے روز وزارت منصوبہ بندی میں منعقد کئے جانے والے سالانہ ترقیاتی منصوبہ کی تعاون کمیٹی کا وفاقی وزیر احسن اقبال کی زیر صدارات اجلاس ہوا۔

اجلاس میں مختلف وفاقی وزارتوں ، خود مختار اداروں اور صوبائی حکومتوں کی جانب سے آئندہ مالی سال کے لیے ترقیاتی منصوبوں کے لیے رقم مختص کرنے کی تجاویز پیش کی گئیں۔ اس موقع پر ہائیر ایجوکیشن کمیشن آف پاکستان کی جانب سے گزشتہ مالی سال کے دوران منظور کئے گئے 35 ارب روپے کو ہی برقرار رکھتے ہوئے اتنی ہی رقم مختص کرنے کی سفارش کی گئی۔

(جاری ہے)

تاہم اس موقع پر وفاقی وزیر منصوبہ بندی احسن اقبال نے یہ رقم از خود 35 ارب روپے سے بڑھا کر 45 ارب کر دی۔

جس پر ہائیر ایجوکیشن کمیشن کے نمائندوں سمیت اجلاس میں شریک تمام نمائندوں نے خوشگوار حیرت کا اظہار کیا۔ احسن اقبال نے کہا کہ عالمی سطح پر مقابلے بازی اور ترقی یافتہ ممالک کی صف میں شامل ہونے کے لیے اعلی تعلیم ، تحقیق اور سائنس و ٹیکنالوجی کے میدان میں زیادہ سے زیادہ رقم خرچ کرنے کی ضرورت ہے۔ انھوں نے کہا کہ آج کی دنیا میں علم ، اقتشاف اور معیاری تحقیق کے میدان میں آگے بڑھنا ہماری قومی ضرورت ہے اور علم پر مبنی معیشت کے قیام کے نتیجے میں ہی ہم اقوام عالم کا مقابلہ کر سکتے ہیں۔

وفاقی وزیر احسن اقبال کا کہنا تھا کہ ہائیر ایجوکیشن کمیشن اعلی تعلیم کو جدید خطوط اور اسلوب پر ڈھالنے کے لیے قابل عمل منصوبے بنائے۔واضح رہے کہ گزشتہ پانچ سال کے دوران اعلی تعلیم کے بجٹ میں 132 فیصد سے زائد کا اضافہ کیا جا چکا ہے۔