پاک فوج نے کابل اور قندھار میں افغان طالبان اور فتنہ الخوارج کے ٹھکانے تباہ کردیئے

جوابی کاروائیوں میں درجنوں خوارج ہلاک، طالبان رجیم کی بٹالین ہیڈکوارٹرز4 اور 8 ، بارڈر بریگیڈ5 کو نشانہ بنایا گیا، سوشل میڈیا پر ہتھیار قبضے میں لینے کی ویڈیو من گھڑت ہے، سکیورٹی ذرائع

ثنااللہ ناگرہ بدھ 15 اکتوبر 2025 23:00

پاک فوج نے کابل اور قندھار میں افغان طالبان اور فتنہ الخوارج کے ٹھکانے ..

اسلام آباد ( اردوپوائنٹ اخبار تازہ ترین۔ انٹرنیشنل پریس ایجنسی۔ 15 اکتوبر 2025ء ) پاک فوج نے کابل اور قندھار میں افغان طالبان اور فتنہ الخوارج کے ٹھکانے تباہ کردیئے، پاک فوج نے دشمن کے حملوں پر جوابی کاروائیوں میں درجنوں خوارج ہلاک کردیئے۔ میڈیا کے مطابق سکیورٹی ذرائع کا کہنا ہے کہ پاک فوج کی جانب سے قابض افغان طالبان کی بٹالین ہیڈکوارٹرز 4 اور 8 اور بارڈربریگیڈ5 کو نشانہ بنایا گیا۔

اس دوران پاک فوج نے آبادی سے دور اہداف کو نشانہ بنا کر پیشہ ورانہ مہارت کا ثبوت دیا ۔کابل میں فتنہ الخوارج کا مرکز اور قیادت کو نشانہ بنایا گیا۔پاک فوج کی ملک دشمنوں کیخلاف تابڑ توڑ جوابی کاروائیاں کامیابی کے ساتھ جاری ہیں، کرم ، ژوب، چمن سیکٹر میں خوارج اور طالبان کے حملے ناکام بنائے گئے۔

(جاری ہے)

نوشکی سیکٹر کی غزنالی پوسٹ پر پاکستانی پرچم لہرا دیا گیا۔

پاک فوج کی مئوثر جوابی کاروائی سے افغان طالبان پسپا ہونے پر مجبور ہوگئے۔ پاک فوج نے جوابی کاروائیوں میں درجنوں خوارج ہلاک کردیئے۔ سکیورٹی ذرائع کا کہنا ہے کہ افغان طالبان اور خوارج کا پاکستان کی چوکی اور ہتھیار قبضے میں لینے کا دعویٰ جھوٹا ہے، سوشل میڈیا پر پاک فوج کے ہتھیار قبضے میں لینے کی ویڈیو من گھڑت ہے۔پاک افغان دوستی گیٹ تباہ کرنے کا افغان طالبان کا پروپیگنڈا بھی بے نقاب کردیا گیا، پاکستان کی جانب پاک افغان دوستی گیٹ بالکل ٹھیک حالت میں ہے۔

مزید برآں پاکستان نے قابض افغان طالبان کی درخواست پر48گھنٹوں کیلئے سیز فائر کردیا ہے، اس وقت کے دوران مسئلے کا تعمیری حل تلاش کیا جائے گا۔ میڈیا کے مطابق پاکستان اور قابض افغان طالبان کے درمیان سیز فائر ہوگیا، پاکستان نے قابض طالبان کی 48گھنٹے کیلئے عارضی جنگ بندی کی درخواست منظور کرلی۔ افغان طالبان رجیم کی درخواست پر شام 6بجے سے 48گھنٹے کیلئے عارضی جنگ بندی کا فیصلہ کیا گیا ہے۔وزارت خارجہ کے مطابق پاکستان اور قابض افغان طالبان کے درمیان عارضی جنگ بندی 17اکتوبر کی شام 6بجے تک برقرار رہے گی۔ 48گھنٹوں میں فریقین تعمیری گفتگو کے ذریعے مسئلے کا حل نکالیں گے، گفتگو سے پیچیدہ مگر مسئلے کا مثبت راستہ تلاش کرنے کی مخلصانہ کوشش ہوگی۔