مسئلہ کشمیر پر آزاد کشمیر کی ساری سیاسی قیادت ایک نقطے پر متحد ومتفق ہے‘پاکستان مسلم لیگ (ن) آزاد کشمیر کی حکومت نے تحریک آزادی کشمیر کو اولین ترجیحات میں شامل کر رکھا ہے

مسلم لیگ (ن) مظفرآباد ڈویژن کے صدر ملک عبدالرشید اعوان کی صحافیوں سے گفتگو

بدھ 18 اپریل 2018 18:18

مظفرآباد(اُردو پوائنٹ اخبارتازہ ترین۔ 18 اپریل2018ء) مسلم لیگ (ن) مظفرآباد ڈویژن کے صدر ملک عبدالرشید اعوان نے کہا ہے کہ مسئلہ کشمیر پر آزاد کشمیر کی ساری سیاسی قیادت ایک نقطے پر متحد ومتفق ہے ۔پاکستان مسلم لیگ ن آزاد کشمیر کی حکومت نے تحریک آزادی کشمیر کو اولین ترجیحات میں شامل کر رکھا ہے۔ تحریک آزادی کشمیر کو قومی اور بین الاقوامی سطح پر اجاگر کرنے کے لیے فاروق حیدر حکومت نے جاندار اقدامات اٹھائے ہیں۔

بھارت کی طرف سے شوپیاں میں حالیہ دہشت گردی کے خلاف پاکستان و آزاد کشمیر کی ساری سیاسی قیادت نے متحد ہو کر آواز بلند کی ہے۔ ان خیالات کا اظہار انہوں نے گزشتہ روز صحافیوں سے گفتگو کرتے ہوئے کیا۔انہوں نے کہا کہ سینئر پارلیمنٹرین راجہ عبدالقیوم خان سمیت نئے وزراء کو ذمہ داریاں سنبھالنے پر مبارکباد پیش کرتے ہیں۔

(جاری ہے)

انہوں نے کہا کہ وزیر اعظم پاکستان شاہد خاقان عباسی نے آزاد کشمیر قانون ساز اسمبلی اور آزادجموں و کشمیر کونسل کے مشترکہ اجلاس سے خطاب کیا اور کشمیر کی جدوجہد آزادی کی مکمل حمایت کا اعلان کر کے اس پر مثبت پیغام دیا۔

بھارت مقبوضہ کشمیر میں انسانی حقوق کی سنگین پامالیوں کا مرتکب ہو رہا ہے بھارتی فوج جنگی جرائم، میں ملوث ہے جس کی اقوام متحدہ کی سطح پر تحقیقات ناگزیر ہیں۔ بھارت نے کشمیر میں اپنے جنگی جرائم کو چھپانے کے لیے وادی کو سیل کر کے انسانی جیل میںتبدیل کر رکھا ہے۔ کشمیر میں بھارت جس انداز میں مظالم ڈھا رہا ہے دنیا میں اس کی مثال نہیں ملتی۔