تحفظ ختم نبوت امت مسلمہ کا مشترکہ پلیٹ فارم ،قادیانیت کے متعلق قوانین ختم نہیں ہونے دیں گے‘عالمی مجلس تحفظ ختم نبوت

قادیانیوں اور انکے آلہ کاروں کو انکی سازشوں میں کامیاب نہیں ہونے دیں گے ‘عالمی مجلس تحفظ ختم نبوت کے مرکزی رہنما ؤں کااجلاس سے خطاب

جمعرات 19 اپریل 2018 14:37

لاہور(اُردو پوائنٹ اخبارتازہ ترین - این این آئی۔ 19 اپریل2018ء) عالمی مجلس تحفظ ختم نبوت رابطہ کمیٹی و ضلعی عہدیداران کا اجلاس جامع مسجد امن باغبانپورہ لاہور میں مجلس لاہور کے سرپرست مولانا قاری جمیل الرحمن اختر کی صدارت میں ہوا۔اجلاس کے مہمان خصوصی عالمی مجلس تحفظ ختم نبوت کے مرکزی رہنما شاہین ختم نبوت مولانا اللہ وسایا،مولانا عزیزالرحمن ثانی ،پیر میا ںرضوان نفیس، مولانا قاضی ہارون الرشید ، مولانا عبدالنعیم ،مولانا قاری علیم الدین شاکر ،مولانا شفیق الرحمن ، قاری ظہورالحق ، مولانا عبیدالرحمن معاویہ،مولانا قاری عبدالعزیز ، مولانا پیر محمدزبیر جمیل ،مولانا خالد محمود، مولانا سعید وقار، خالدمبین نے شرکت کی۔

مولانا اللہ وسایا نے بیان کرتے ہوئے کہا کہ تحفظ ختم نبوت امت مسلمہ کا مشترکہ پلیٹ فارم ہے ،ختم نبوت اور قادیانیت کے متعلق قوانین ختم نہیں ہونے دیں گے۔

(جاری ہے)

انہوں نے کہا کہ عقیدہ ختم نبوت دین کا اساسی اور بنیادی عقیدہ ہے ،قرآن میں ایک سو مرتبہ اور احادیث میں دوسو دس مرتبہ ختم نبوت کی اہمیت کو بیان کیا گیا ہے۔عقیدہ ختم نبوت اور ناموس رسالت کی حفاظت کے لیے امت مسلمہ ہمیشہ حساس رہی ہے عقیدہ ختم نبوت کے تحفظ کے لیے بارہ سو صحابہ کرام نے جام شہادت نوش کیا ہے۔

عقیدہ ختم نبوت پر پورے دین کی عمارت قائم ہے اور اسی میں امت مسلمہ کی وحدت کا راز مضمر ہے۔مولانا عزیزالرحمن ثانی نے بیان کرتے ہوئے کہا کہ تحفظ ناموس رسالت قانون میں تبدیلی ہرگزبرداشت نہیں کریں گے انہوںنے کہاسلام کے نام پر بننے والے ملک میں ناموس رسالت ایکٹ کے خلاف ہر سازش کا مقابلہ کیا جائے گا ۔ناموس رسالت کا قانون تمام انبیاء کرام کی عزت اور ناموس کا دربان اور چوکیدار ہے ۔

آئین کی دفعہ295-C تحفظ ناموس رسالت ایکٹ کیخلاف کوئی بات برداشت نہیں کریں گے ۔مجلس لاہور کے مبلغ مولانا عبدالنعیم نے کہا کہ قادیانی اپنے کفر و ارتداد اور اپنے الحاد آفریں نظریات کو اسلام باور کرواکے عالمی دنیا کو دھوکہ دے رہے ہیں۔ہم اسلام و ملک دشمن قوتوں اور انکے آلہ کاروں کو متنبہ کرتے ہیں کہ وہ آئین کی اسلامی دفعات اور تحفظ ناموس رسالت کے ایکٹ کیخلاف اپنی مہم جوئی بند کریں ۔اجلاس میں ضلعی ختم نبوت علماء کنونشن ، متعدد کورسزاوررمضان المبارک میں دروس ختم نبوت طے کیے گئے۔رمضان المبارک کاپورا مہینہ آگاہی ختم نبوت کے طورپر منائے جانے کا اعلان بھی کیا گیا۔