لاہورپھرپاکستان کا آلودہ ترین شہرقراز، پنجاب میں ایمرجنسی ایکشن پلان فعا ل

منگل 21 اکتوبر 2025 16:59

لاہور(اُردو پوائنٹ اخبارتازہ ترین - این این آئی۔ 21 اکتوبر2025ء) لاہور ایک بار پھر آلودہ ترین شہروں میں سرفہرست آگیا، صوبائی دارالحکومت کا اوسط ایئر کوالٹی انڈیکس 266 تک پہنچ گیا جس کے پیش نظر پنجاب میں ایمرجنسی ایکشن پلان فعال کر دیا گیا ،صوبائی دارالحکومت میں عسکری 10 کے علاقے کا ایئر کوالٹی انڈیکس 414 ریکارڈ کیا گیا ہے جبکہ سید مراتب علی روڈ کے علاقے کا ایئر کوالٹی انڈیکس 424 اور ڈی ایچ اے کا ایئر کوالٹی انڈیکس 328 تک جا پہنچا ہے۔

بھارت میں دیوالی کے تہوار کے باعث آلودہ ہوائیں پنجاب کے مختلف شہروں میں داخل ہو ئیں جس کے پیش نظر پنجاب میں ایمرجنسی ایکشن پلان فعال کر دیا گیا، ایمرجنسی ایکشن پلان کے تحت صوبے میں دھواں چھوڑنے والی گاڑیوں کے خلاف کریک ڈاؤن بھی شروع کر دیاگیا، بغیر فٹنس سرٹیفکیٹ چلنے والی گاڑیوں کو فوری بند کیا جائے گا۔

(جاری ہے)

دوسری جانب بھارت کا شہر نئی دہلی آج دنیا کا آلودہ ترین شہر قرار دے دیا گیا، دہلی کا اے کیو آئی 680 تک ریکارڈ کیا گیا ہے جبکہ دنیا کے آلودہ ترین شہروں میں لاہور دوسرے نمبر پر آ گیا ہے۔

نئی دہلی کی آلودگی کے باعث لاہور میں بھی دھند اور سموگ بڑھے گی، لاہور میں شدید سموگ کا خدشہ بڑھ گیا، شہریوں کو ماسک کے استعمال کی ہدایت کی گئی ہے جبکہ شدید دھند اور سموگ بڑھنے کے باعث سموگ مانیٹرنگ اینڈ کنٹرول سینٹر نے ایڈوائزری جاری کردی۔