صدر آزاد جموں و کشمیر سے پاکستان میں تعینات جرمنی کے سفیر مارٹن کوبلر کی میں ملاقات،جرمنی کے سفیر کو آزادکشمیر میں آنے کی دعوت

جرمن ایک مضبوط اور طاقتور قوم ہیں جنہوں نے سائنس و ٹیکنالوجی کے شعبے میں حیرت انگیز ترقی کی ہے ،ْسردار مسعود خان میرا ملک جرمنی آزادکشمیر اور جرمنی کے لوگوں کے درمیان ادبی و ثقافتی تعلقات کو فروغ دینے کا خواہا ں ہے ،ْ جرمن سفیر مارٹن کوبلر

جمعرات 19 اپریل 2018 16:30

اسلام آباد (اُردو پوائنٹ اخبارتازہ ترین - این این آئی۔ 19 اپریل2018ء) صدر آزاد جموں و کشمیر سردار مسعود خان سے پاکستان میں تعینات جرمنی کے سفیر مارٹن کوبلر نے ایوان صدر کشمیر ہائوس میں ملاقات کی۔ صدر مسعود خان نے اس موقع پر کہا کہ پاکستان اور جرمنی کے درمیان دوستانہ تعلقات ہیں ۔ صدر نے کہا کہ جرمن ایک مضبوط اور طاقتور قوم ہیں جنہوں نے سائنس و ٹیکنالوجی کے شعبے میں حیرت انگیز ترقی کی ہے اور پوری دنیا میں معیار کے اعتبار سے اپنا لوہا منوایا ہے۔

صدر آزاد کشمیر نے جرمنی کے سفیر کو آزادکشمیر میں آنے کی دعوت دی اور کہا کہ وہ توانائی کی پیدوار ، صنعتی ترقی کے شعبوں میں آزاد کشمیر میں سرمایہ کاری کریں۔ صدر آزادکشمیر نے مسٹر مارٹن کوبلر کی تعریف کی کہ انہوں نے بڑی کمال مہارت سے اور اپنی قائدانہ صلاحیتوں کی بدولت پاک جرمن تعلقات کو مضبوط و مستحکم کیا۔

(جاری ہے)

اس موقع پر جرمنی کے سفیر نے پاکستانی عوام کا شکریہ ادا کیا کہ انہوں نے بڑی گرمجوشی سے اور بصد احترام ان کا استقبال کیا اور پاک جرمن تعلقات کو مضبوط بنانے میں اپنا کردار ادا کیا۔

انہوں نے کہا کہ پاکستان کے لوگ ذہین ، فطین اور محنتی ہیں اور ان کے اندر پاکستان کی معیشت کو باہم عروج تک لے جانے کی کما حقہ صلاحیت موجود ہے۔ پاکستانی دنیا کی ایک ابھرتی ہوئی قوم ہیں ۔ مارٹن کوبلر نے مزید کہا کہ آزادکشمیر ایک دلکش سیاحتی مرکز ہے اور میرا ملک جرمنی آزادکشمیر اور جرمنی کے لوگوں کے درمیان ادبی و ثقافتی تعلقات کو فروغ دینے کا خواہا ں ہے۔