Live Updates

وفاقی وزیرِریلوے کی ایرانی سفیر ڈاکٹر رضا امیری مقدم سے ملاقات

جمعرات 7 مئی 2026 18:07

اسلام آباد(اُردو پوائنٹ اخبارتازہ ترین - آن لائن۔ 07 مئی2026ء) وفاقی وزیرِ ریلوے محمد حنیف عباسی نے پاکستان میں تعینات ایرانی سفیر ڈاکٹر رضا امیری مقدم سے ملاقات کی، جس میں پاکستان اور ایران کے درمیان دوطرفہ تعلقات، ریلوے تعاون اور خطے کی مجموعی صورتحال پر تفصیلی تبادلہ خیال کیا گیا۔وفاقی وزیرِ ریلوے نے اس موقع پر کہا کہ پاکستان ایران کے ساتھ اپنے تاریخی، ثقافتی اور برادرانہ تعلقات کو نہایت اہمیت دیتا ہے اور دونوں ممالک کے درمیان تعاون کو مزید وسعت دینے کے لیے پرعزم ہے۔

انہوں نے کہا کہ باہمی احترام اور مشترکہ مفادات پر مبنی تعلقات دونوں ممالک کے عوام کے لیے فائدہ مند ثابت ہوں گے۔ملاقات کے دوران پاکستان اور ایران کے درمیان ریلوے روابط کو مزید فعال بنانے کے امور زیرِ غور آئے، خصوصا تفتانزاہدان ریلوے روٹ اور اسلام آبادتہراناستنبول (ITI) فریٹ ٹرین منصوبے پر تفصیلی گفتگو کی گئی۔

(جاری ہے)

فریقین نے اس امر پر اتفاق کیا کہ علاقائی تجارت اور روابط کے فروغ کے لیے ریلوے تعاون کو مزید مضبوط بنانا وقت کی اہم ضرورت ہے۔

اس موقع پر کوئٹہتفتان ریلوے سیکشن کی مرمت اور بحالی سے متعلق جاری اقدامات کا بھی جائزہ لیا گیا۔ وفاقی وزیرِ ریلوے نے کہا کہ ریلوے آپریشنز کے تسلسل اور مثر فعالیت کے لیے سیکیورٹی اقدامات اور انفراسٹرکچر کی بہتری ناگزیر ہے۔ملاقات میں خطے، بالخصوص مشرقِ وسطی کی صورتحال پر بھی تبادلہ خیال کیا گیا۔ پاکستان نے ایک مرتبہ پھر امن، مذاکرات اور سفارتی ذرائع سے مسائل کے حل کی حمایت کا اعادہ کیا۔

ایرانی سفیر ڈاکٹر رضا امیری مقدم نے خطے میں امن و استحکام کے لیے پاکستان کے مثبت اور تعمیری کردار کو سراہتے ہوئے کہا کہ پاکستان کی سفارتی کوششیں قابلِ تحسین ہیں فریقین نے وزیراعظم محمد شہباز شریف اور فیلڈ مارشل سید عاصم منیر کی قیادت میں امن، مذاکرات اور کشیدگی میں کمی کے لیے جاری کوششوں کو مؤثر قرار دیا۔ وفاقی وزیرِ ریلوے نے کہا کہ پاکستان ہمیشہ مکالمے، باہمی احترام اور پرامن حل پر یقین رکھتا ہے اور خطے میں امن و استحکام کے لیے اپنی سفارتی حمایت جاری رکھے گا۔ملاقات خوشگوار ماحول میں ہوئی، جس میں دونوں ممالک کے درمیان ریلوے اور دیگر شعبوں میں دوطرفہ تعاون کو مزید فروغ دینے پر اتفاق کیا گیا۔