آئی جی خیبرپختونخوا نے اہم شخصیات کی حفاظت پر مامور عملہ کی واپسی کے احکامات جاری کردیئے

جمعرات 19 اپریل 2018 22:49

پشاور۔ (اُردو پوائنٹ اخبارتازہ ترین - اے پی پی۔ 19 اپریل2018ء) آئی جی پی خیبر پختونخوا صلاح الدین خان محسود نے چیف جسٹس سپریم کورٹ کے احکامات کی روشنی میں صوبہ بھرمیں مختلف شخصیات کی حفاظت پر مامور پولیس سیکورٹی عملہ کی واپسی کے احکامات جاری کردیئے۔تمام ریجنل پولیس افسروں کو سیاسی و مذہبی رہنمائوں ، افسروںاور پرائیویٹ اشخاص کے پاس گارڈز اور گن مینوں کو فوری طور پر متعلقہ پولیس لائنز ہیڈ کوارٹرز میں رپورٹ کرنے کی ہدایت کی گئی۔

قبل ازیں آئی جی کے پی نے عدالت میں پیشی کے موقع پر وی آئی پیز پروٹوکول سیکورٹی کی رپورٹ عدالت میں پیش کی۔ انہوں نے بتایاکہ تین ہزار سیکورٹی اہلکار مختلف افراد کی سیکورٹی پر مامور ہیں، سترہ فیصد غیر مستحق کو سیکورٹی دی گئی ہے احکامات جاری کر دئے ہیں شام چھ بجے تک تمام اہلکار واپس آجائیں گے۔

(جاری ہے)

دوران سماعت چیف جسٹس میاں ثاقب نثار نے استفسارکیاکہ آپ کا نام آئی جی صلاح الدین خان ہے،آئی جی نے کہاجی ہاں جس پر چیف جسٹس نے کہاکہ آپ کی بہت تعریف سنی ہے۔

چیف جسٹس میاں ثاقب نثارنے کہاکہ دہشتگردی میں ذاتی طور پر آپ کا بہت نقصان ہوا ہے۔ چیف جسٹس کے استفسارپر آئی جی نے بتایاکہ تین ہزارکے قریب غیر متعلقہ لوگوں کے پاس پولیس سکیورٹی ہے جس پرچیف جسٹس نے حکم دیاکہ ایسی تمام سیکورٹی آج رات تک واپس لی جائے، ان احکامات کی روشنی میں آئی جی خیبرپختونخوا نے عملہ کی واپسی کے احکامات جاری کردئیے۔