پاک بحریہ کے سربراہ ایڈمرل ظفر محمود عباسی کی ایران آرمی کے سربراہ اور عالمی بحری افواج کے سربراہان کے ساتھ ملاقاتیں ،باہمی دلچسپی کے اُمور پر تبادلہ خیال کیا گیا

اسلام آباد ۔ (اُردو پوائنٹ اخبارتازہ ترین - اے پی پی۔ 25 اپریل2018ء) پاک بحریہ کے سربراہ ایڈمرل ظفر محمود عباسی نے جو چھٹے انڈین اوشن نیول سمپوزیم کے کنکلیو آف چیفس میں شرکت کے لیے ایران کے سرکاری دورے پر ہیںایران کے اعلیٰ حکام بشمول ایران آرمی کے سربراہ میجر جنرل سید عبدالرحیم موساوی اور عالمی بحری افواج کے سربراہان کے ساتھ ملاقاتیں کیں جن میں باہمی دلچسپی کے اُمور پر تبادلہ خیال کیا گیا۔

ترجمان پاک بحریہ کے مطابق انڈین اوشن نیول سمپوزیم اور کنکلیو آف چیفس کے دوران پاک بحریہ کے سربراہ اور ۔ایڈمرل ظفر محمود عباسی نے شرکاء کو پاکستان کے میری ٹائم نقطہ نظر اور خطے کی میری ٹائم سکیورٹی کو یقینی بنانے میں پاک بحریہ کی خدمات اور خطے کے لیے سی پیک سے پیدا ہونے والے خوشحالی کے مواقع سے آگاہ کیا۔

(جاری ہے)

نیول چیف نے بحرِ ہند کی سکیورٹی کو درپیش چیلنجز پر روشنی ڈالی اور خطے کی میری ٹائم سکیورٹی کو مزید بہتر بنانے کے لیے علاقائی بحری افوا ج کے اشتراک کی اہمیت کو اُجاگر کیا۔

بحری اقتصادیات سے بھر پور فائدہ اُٹھانے کے لیے آپ نے بحرِ ہند کے ساحلی ممالک کے اشتراک پر زور دیا۔انڈین اوشن نیول سمپوزیم ایک ایسا اقدام ہے جس کا مقصد مشترکہ علاقائی میری ٹائم فورم کی تشکیل ہے ۔انڈین اوشن نیول سمپوزیم کے دوران بحرِ ہند کی میری ٹائم سکیورٹی سے متعلقہ مسائل پر پینل مباحثے اور انڈین نیول اوشن سمپوزیم کے ممبرز اور آبزرور ممالک کی بحری افواج کے سربراہان کے اجلاس جیسی سرگرمیوں کا انعقاد کیا گیا۔

پینل مباحثے کے دوران وائس ایڈمرل (ریٹائرڈ) افتخار احمد نے ’’میری ٹائم ٹریڈ وژن آف انڈین اوشن‘‘ کے موضوع پر مقالہ پڑھا۔ واضح رہے کہ پاکستان مارچ2014کو آسٹریلیا میں منعقدہ کنکلیو آف چیفس اجلاس میں انڈین اوشن نیول سمپوزیم کا ممبر بنا۔ موجودہ وقت میں 23ممالک اس سمپوزیم کے ممبرز اور 9ممالک اس کے آبزرورز ہیں۔پاک بحریہ انڈین اوشن نیول سمپوزیم کی سرگرمیوں میں بھر پور انداز سے شرکت کرتا ہے کیونکہ یہ سمپوزیم مشترکہ عالمی بھلائی کے لیے شریک ممالک کو مل کر کام کرنے کا پلیٹ فارم مہیا کرتا ہے۔

انڈین اوشن نیول سمپوزیم اور کنکلیو آف چیفس میں پاک بحریہ کے سربراہ کی شرکت علاقائی امن کے سلسلے میں پاکستان کے عزم کی عکاس ہے اور ایک مشترکہ سوچ کے ذریعے علاقائی میری ٹائم سکیورٹی کو یقینی بنانے کے سلسلے میں پاک بحریہ کی کاوشوں کا مظہر ہے۔