مون سون شروع ہونے سے قبل بلدیاتی ادارے گندے پانی کے نا لوں کی صفائی کا عمل شروع کر دیں، منشاء اللہ بٹ

جمعہ اپریل 17:17

لاہور۔27 اپریل(اُردو پوائنٹ اخبارتازہ ترین۔ 27 اپریل2018ء) صوبائی وزیر لوکل گورنمنٹ و کمیونٹی ڈویلپمنٹ محمد منشاء اللہ بٹ نے کہا ہے کہ تمام بلدیاتی ادارے مون سون بارشیں شروع ہونے سے قبل اپنے علاقو ں سے گندے پانی کے نکاس کے نا لوں کی صفائی کا عمل شروع کر دیں تاکہ گندے پانی کے نکاسی کے بہائو میں کسی قسم کی رکاوٹ نہ ہونے پائے، انہوں نے کہا کہ تمام بلدیاتی ادارے فوری طور پرناجائز تجاوزات کے خاتمہ میں بھی بلا لحاظ و بلا تفریق تیزی لائیں،اگرکرپٹ مافیا دوبارہ نا جائز تجاوزات کے سلسلے میںمدد گار ثا بت ہو تو اس کے خلاف یک طرفہ کارروائی عمل میں لائی جائے،انہوں نے کہا کہ وزیر اعلیٰ صوبہ پنجاب کوصفائی ستھرائی کے معاملے میں دیگر صوبوں کے لئے رول ماڈل بنانا چاہتے ہیں،بنیادی سطح پر عوام کو ہر قسم کی سہولیات کی فراہمی حکومت کا نصب العین ہے،اس سلسلے میں کسی قسم کی کو تاہی برداشت نہ کی جائے گی، انہوں نے کہا کہ تمام یو سیز سے ناجائز تجا وزات کے خاتمہ کی رپورٹ طلب کی جائے گی اور اچانک انسپکشن کے دوران کسی قسم کی بھی کو تاہی پائی گئی تو متعلقہ افسران کے خلاف سخت ایکشن لیا جائے گا۔