حمزہ علی عباسی کی فلم ’پرواز ہے جنون‘ ریلیزسے قبل ہی مشکلات کا شکارہوگئی

ڈیزائنر سومررحمان کی جانب سے ایم ڈی فلمزاورایم ڈی پروڈکشنزکے سربراہ اور وائس پریزیڈنٹ کے خلاف کیس 27 اپریل کوفائل کیا گیا تھا

ہفتہ مئی 12:48

حمزہ علی عباسی کی فلم ’پرواز ہے جنون‘ ریلیزسے قبل ہی مشکلات کا شکارہوگئی
کراچی(اُردو پوائنٹ اخبارتازہ ترین۔ 05 مئی2018ء) نامورپاکستانی اداکار حمزہ علی عباسی کی فلم ’پرواز ہے جنون‘ ریلیزسے قبل ہی مشکلات کا شکارہوگئی۔۔پاکستان ایئرفورس کے تعاون سے بنائی گئی فلم ’پروازہے جنون‘ کا انتظار شائقین بے چینی سے کرنے لگے۔ فلم میں اداکار حمزہ علی عباسی مرکزی کرداراداکررہے ہیں جبکہ گزشتہ ماہ فلم کا پہلا ٹیزرجاری کیا گیا تھا جس میں حمزہ علی عباسی پاک فضائیہ کے پائلٹ کے روپ میں بے حد شاندار نظر آرہے تھے۔

فلم کے ٹیزر نے ریلیز ہوتے ہی دھوم مچادی تھی تاہم فلم اس وقت مشکلات کاشکار ہوگئی جب فلم کے وارڈ روب اسٹائلسٹ (لباس ڈیزائنر) سومررحمان نے پروڈکشن ہاؤس پر کیس فائل کردیا۔سومررحمان نے بتایا کہ فلم کے جاری ہونے والے ٹیزر میں ان کا نام ہی شامل نہیں کیا گیا، کیس میں ہونے والی نئی پیش رفت کے مطابق عدالت نے فلم کے کسی بھی طرح کے تشہیری مواد (ٹریلراورٹیزر) کو ریلیزسے روک دیا ہے۔

(جاری ہے)

ڈیزائنر سومررحمان کی جانب سے ایم ڈی فلمزاورایم ڈی پروڈکشنزکے سربراہ اور وائس پریزیڈنٹ کے خلاف کیس 27 اپریل کوفائل کیا گیا تھا جب کہ کیس کی پہلی سماعت 30 اپریل کو ہوئی تھی۔ سومر رحمان کے مطابق سماعت کے دوران عدالت نے حکم جاری کرتے ہوئے پروڈکشن ہاؤس کواگلی سماعت تک میرے نام کے بغیرفلم کے ٹریلر، ٹیزر ،ْپوسٹر یا گانے کو جاری کرنے سے روک دیا ہے۔

سومر نے ٹیزر میں ان کا نام شامل نہ کیے جانے پر پروڈکشن ہاؤس سے تحریری معافی اور اپنے بقایا جات کی واپسی کا مطالبہ کیا ہے۔ سومر کا مزید کہنا ہے کہ ایم ڈی پروڈکشن ہاؤس کا ریکارڈ ہے کہ وہ نوجوان فنکاروں کی صلاحیتوں کا استحصال کرتے ہیں۔۔فلم کو درپیش قانونی مشکلات اور عدالتی حکم کے پیش نظر ابھی تک یہ واضح نہیں ہوسکا کہ فلم اپنے مقررہ وقت پر ریلیز ہوسکے گی یا نہیں۔واضح رہے کہ ہدایت کار حسیب حسن کی فلم ’پرواز ہے جنون‘میں اداکار حمزہ علی عباسی مرکزی کردار اداکررہے ہیں جبکہ دیگر کاسٹ میں اداکارہ ہانیہ عامر، شمعون عباسی، احد رضامیر، شاز خان اور کبریٰ خان شامل ہیں فلم عیدالفطر کے موقع پر ریلیز کی جائیگی۔