جینا ہاسپل نے ’سی آئی اے‘ کی پہلی خاتون سربراہ کی حیثیت سے اپنے منصب کا حلف اٹھا لیا

منگل 22 مئی 2018 16:50

واشنگٹن(اُردو پوائنٹ اخبارتازہ ترین - این این آئی۔ 22 مئی2018ء) جینا ہاسپل نے امریکا کے خفیہ ادارے ’سی آئی اے‘ کی پہلی خاتون سربراہ کی حیثیت سے اپنے منصب کا حلف اٹھا لیا۔غیر ملکی میڈیا کے مطابق امریکا کے خفیہ ادارے سینٹرل انویسٹی گیشن اتھارٹی کے صدر دفتر میں ہونے والی ایک پٴْر وقار تقریب میں 61 سالہ جینا ہاسپل نے اپنے منصب کا حلف اٴْٹھالیا۔

موجودہ وزیر خارجہ اور سابق ڈائریکٹر سی آئی اے مائیک پومپیو نے پہلی خاتون ڈائریکٹر سے حلف لیا۔ تقریب میں امریکی صدر ڈونلڈ ٹرمپ نے بھی خصوصی طور پر شرکت کی۔سی آئی اے ڈائریکٹر کی ذمہ داریاں سنبھالنے والی جینا ہاسپل نے اپنی تقرری پر امریکی صدر کا شکریہ ادا کرتے ہوئے اپنی ذمہ داریوں کو احسن طریقے سے ادا کرنے کا عہد کیا۔

(جاری ہے)

جینا ہاسپل اس سے قبل اسی ادارے میں نائب سربراہ کی حیثیت سے خدمات انجام دے رہی تھیں اور انہوں نے مائیک پومپیو کی جگہ بطور ’سی آئی اے‘ ڈائریکٹر منصب سنبھالا ہے جب کہ مائیک پومپیو اس وقت وزیر خارجہ کی ذمہ داریاں نبھا رہے ہیں۔

اس موقع پر تقریب سے خطاب کرتے ہوئے صدر ٹرمپ نے کہا کہ جینا ایک مضبوط اعصاب رکھنے والی خاتون ہیں اور جب امریکا کے دفاع کی بات آئے گی تو ہاسپل کبھی پیچھے نہیں ہٹیں گی اور ملک کی سلامتی اور حفاظت کے لیے اپنی تمام تر صلاحیتوں کو بروئے کار لائیں گی جیسا کہ انہوں نے بطور نائب ڈائریکٹر سی آئی اے اپنی خدمات پیش کیں۔