لاہور ہائیکورٹ نے کاغذات نامزدگی میں ترمیم کالعدم قرار دے دیں ،الیکشن کمیشن کو نئے کاغذات نامزدگی تیار کرنے کا حکم

غیر ملکی آمدن ،زیر کفالت افراد کی تفصیلات ،قرضہ نادہندگی ،دوہری شہریت ،یوٹیلٹی ڈیفالٹ ،پاسپورٹس ،مجرمانہ سرگرمیاں ،مقدمات کا ریکارڈ ،ٹیکس ڈیفالٹ چھپانے کے اقدام کالعدم قرار ،نئے کاغذات نامزدگی میں آئین کے آرٹیکل 62اور 63کے تقاضے دوبارہ شامل کئے جائیں‘حکم

جمعہ 1 جون 2018 20:04

لاہور ہائیکورٹ نے کاغذات نامزدگی میں ترمیم کالعدم قرار دے دیں ،الیکشن ..

لاہور (اُردو پوائنٹ اخبارتازہ ترین - این این آئی۔ 01 جون2018ء) لاہور ہائیکورٹ نے کاغذات نامزدگی میں ترمیم کالعدم قرار دیتے ہوئے الیکشن کمیشن کو نئے کاغذات نامزدگی تیار کرنے کا حکم دیدیا۔ گزشتہ روز لاہور ہائیکورٹ کی جسٹس عائشہ اے ملک نے آئینی ماہر سعد رسول کی درخواست پر فیصلہ سنایا ۔ سعد رسول نے الیکشن ایکٹ کی دفعہ 60، 110اور 137کو چیلنج کیا تھا۔

(جاری ہے)

عدالت نے کاغذات نامزدگی میں غیر ملکی آمدن ،زیر کفالت افراد کی تفصیلات ،قرضہ نادہندگی ،دوہری شہریت ،یوٹیلٹی ڈیفالٹ ،پاسپورٹس ،مجرمانہ سرگرمیاں ،مقدمات کا ریکارڈ ،ٹیکس ڈیفالٹ چھپانے کے اقدام کالعدم قرار دے دیئے ۔فاضل عدالت نے کاغذات نامزدگی آئین سے متصادم قرار دیتے ہوئے الیکشن کمیشن کو نئے کاغذات نامزدگی تیار کرنے کا حکم دیدیا اور حکم نامے میں کہا گیا ہے کہ نئے کاغذات نامزدگی میں آئین کے آرٹیکل 62اور 63کے تقاضے دوبارہ شامل کئے جائیں۔