قابض اسرائیلی فوج کی فلسطین کے مقبوضہ مغربی کنارے اور بیت المقدس میں گھر گھر تلاشی کی کارروائیاں

22 فلسطینی شہریوں کو حراست میں لینے کے بعد نامعلوم مقام پر منتقل کردیا گیا

جمعہ 29 جون 2018 15:26

غرب اردن (اُردو پوائنٹ اخبارتازہ ترین - این این آئی۔ 29 جون2018ء) قابض اسرائیلی فوج نے فلسطین کے مقبوضہ مغربی کنارے اور بیت المقدس میں گھر گھر تلاشی کی کارروائیوں کے دوران 22 فلسطینی شہریوں کو حراست میں لینے کے بعد نامعلوم مقام پر منتقل کردیا ہے۔ گرفتار فلسطینیوں میں سابق اسیران بھی شامل ہیں۔اسرائیلی فوج کی طرف سے جاری بیان میں کہا گیا ہے کہ تلاشی کی کارروائیوں میں 13 اشتہاری شامل ہیں جو اسرائیلی تنصیبات اور یہودی آباد کاروں پر مزاحمتی سرگرمیوں میں ملوث ہونے کی وجہ سے سیکیورٹی اداروں کو مطلوب تھے۔

اطلاعات کے مطابق اسرائیلی فوجیوں نے غرب اردن میں جمعرات کی شام گھر گھر تلاشی کی کارروائیوں کے دوران فلسطینیوں کے گھروں میں توڑپھوڑ کی، طلائی زیورات اور بڑی مقدارمیں نقدی لوٹ لی۔

(جاری ہے)

اسرائیلی فوج نے جبل الشمالی میں کارروائی کے دوران عوامی محاذ کے رہنما محمد صبیح طنجہ، جسر التیتی میں وائل الفقیہ اور دیگر فلسطینیوں کو حراست میں لے لیا۔

ادھر نابلس میں مادما کے مقام پر اسرائیلی فوج کی کارروائیوں میں ثابت نصار کو حراست میں لیا گیا۔ اس کے علاوہ سابق اسیر محمد سعید عواد کو عورتا کے مقام سے حراست میں لیا گیا۔قابض فوج نے جنوب مشرقی نابلس میں عورتا کے مقام پر محمد سعید عواد اور دیگر فلسطینیوں کو حراست میں لے لیا۔جنوبی نابلس میں اسرائیلی فوج نے دو فلسطینی بچوں جن کی عمریں 17 سال ہیں کو حراست میں لے لیا۔

ادھر الخلیل شہر میں اسرائیلی فوج نے بیت لحم میں گھر جاتے ہوئے ایک فلسطینی خاتون کو گرفتار کرکے نامعلوم مقام پر منتقل کردیا۔ مرکزاطلاعات فلسطین کے مطابق صہیونی انٹیلی جنس حکام نی53 سالہ روضہ محمد ابو عیشہ کو بیت المقدس سے واپسی پر گرفتار کیا گیا۔ادھر غرب اردن کے شمالی شہر طوباس میں اسرائیلی فوج نے گھر گھر تلاشی کے دوران 3 فلسطینیوں کو حراست میں لے لیا۔ جب کہ شہر کے شمالی قصبے حلحول سے چار فلسطینیوں کو گرفتار کیا۔قابض فوج نے بیت لحم میں دو فلسطینیوں کو حراست میں لے لیا۔ شمالی رام اللہ میں جلزون اور بیت ریما سے متعدد فلسطینیوں کو حراست میں لے لیا۔