آصف علی زرداری کی سیاسی کارکنوں پر دہشتگردی کے ایکٹ کے تحت مقدمات داخل کرنے کی شدید مذمت

ملک کا آئین جمہوری آزادی کی ضمانت دیتا ہے، اظہار رائے کی آزادی پر قدغن قابل قبول نہیں،صدر پاکستان پیپلزپارٹی پارلیمنٹیرینز

اتوار 15 جولائی 2018 19:30

کراچی (اُردو پوائنٹ اخبارتازہ ترین - این این آئی۔ 15 جولائی2018ء) سابق صدر پاکستان اور پاکستان پیپلزپارٹی پارلیمنٹیرینز کے صدر آصف علی زرداری نے سیاسی کارکنوں پر دہشتگردی کے ایکٹ کے تحت مقدمات داخل کرنے کی سخت الفاظ میں مزمت کرتے ہوئے کہا ہے کہ ملک کا آئین جمہوری آزادی کی ضمانت دیتا ہے، اظہار رائے کی آزادی پر قدغن قابل قبول نہیں۔ آصف علی زرداری نے کہا کہ سیاسی کارکن جمہوریت کی طاقت ہیں۔

انہوں نے کہا کہ پاکستان پیپلزپارٹی کی حکومت میں کوئی سیاسی قیدی نہیں تھا۔ انہوں نے کہا کہ گالی اور گولی کی سیاست جمہوریت کی دشمن ہے۔ جن کی زبان پر گالی ہے وہ عوام کو کیا دیں گے۔ الیکشن کمیشن کا یہ فرض ہے کہ وہ تمام سیاسی پارٹیوں کو انتخابات میں سازگار ماحول فراہم کرے۔

(جاری ہے)

آصف علی زرداری نے کہا کہ بلاول بھٹو کو سکیورٹی خدشات ضرور ہیں مگر وہ عوام سے دور نہیں رہ سکتے۔

انہوں نے دادو میں پیپلزپارٹی کے امیدوار برائے قومی اسمبلی کے جلوس پر فائرنگ کی مزمت کرتے ہوئے حکومت سندھ سے کہا ہے کہ وہ ملزمان کو گرفتار کرے۔ آصف علی زرداری نے پارٹی کے زخمی کارکنوں کی جلد صحتیابی کی دعا کرتے ہوئے پارٹی کارکنوں کو ہدایت کی ہے کہ وہ صبر وتحمل سے کام لیں اور پرامن طریقے سے انتخابی مہم کو رواں دواں رکھیں۔