این اے 102 سے پی ٹی آئی کامیاب ، ن لیگی رہنما طلال چوہدری کو شکست کا سامنا

این اے 102 سے پی ٹی آئی کے اُمیدوار نواب شیر نے 109706 ووٹ حاصل کر کے کامیابی حاصل کی

سمیرا فقیرحسین جمعرات 26 جولائی 2018 15:57

این اے 102 سے پی ٹی آئی کامیاب ، ن لیگی رہنما طلال چوہدری کو شکست کا سامنا

فیصل آباد (اُردو پوائنٹ تازہ ترین اخبار۔ 26 جولائی 2018ء) : فیصل آباد کے حلقہ این اے 102سے مسلم لیگ ن کو دھچکا لگ گیا ۔ این اے 102 سے مسلم لیگ ن کے رہنما طلال چوہدری کو شکست کا سامنا کرنا پڑا جبکہ پاکستان تحریک انصاف کے اُمیدوار نواب شیر نے کامیابی اپنے نام کی۔ غیر سرکاری اورغیر حتمی نتائج کےمطابق پی ٹی آئی کے رہنما نواب شیر نے 109706 ووٹ حاصل کر کے حلقے میں کامیابی اپنے نام کی جبکہ مسلم لیگ ن کے اُمیدوار طلال چوہدری 97869 ووٹ حاصل کر کے دوسرے نمبر پر رہے۔

یاد رہے کہ عام انتخابات 2018ء کے تحت گذشتہ روز ملک بھر میں پولنگ ہوئی۔ گذشتہ روز دن بھر عوام نے پولنگ اسٹیشنز کا رُخ کیا اور اپنے پسندیدہ اُمیدوار اور جماعت کو ووٹ ڈالا۔ انتخابات 2018ء کے غیر سرکاری غیر حتمی نتائج آنے کا سلسلہ جاری ہے۔

(جاری ہے)

بدھ کے روز ہونے والے پاکستان کے عام انتخابات کے سلسلے میں پولنگ شام 6 بجے ہی ختم ہوگئی تھی۔ پولنگ ختم ہونے کے ایک گھںٹے بعد غیر سرکاری غیر حتمی نتائج آنے کا سلسلہ شروع ہوا۔

اس سلسلے میں قومی اسمبلی کی نشستوں کے متعدد پولنگ اسٹیشنز کے غیر سرکاری غیر حتمی نتائج بھی سامنے آ چکے ہیں۔ اب تک موصول ہونے والے غیر سرکاری غیر حتمی نتائج کے مطابق تحریک انصاف باقی جماعتوں پر برتری حاصل کیے ہوئے ہے۔ قومی اسمبلی کی نشستوں کے غیر سرکاری غیر حتمی نتائج میں سے تحریک انصاف اب تک کُل 120، ن لیگ کو 61، پیپلز پارٹی کو 40 جبکہ آزاد اُمیدواروں 16 نشستوں پر برتری حاصل ہے۔

دوسری جانب پنجاب اسمبلی میں بھی پی ٹی آئی کو برتری حاصل ہے۔ پنجاب اسمبلی میں پی ٹی آئی کو 117 ، پاکستان مسلم لیگ ن کو 115 جبکہ پاکستان پیپلز پارٹی کو 6 نشستوں پر برتری حاصل ہے۔ مسلم لیگ ن کو عام انتخابات میں کئی اہم اور نمایاں حلقوں سےشکست کا سامنا رہا ہے جس پر پارٹی قیادت نے مایوس ہو کر الیکشن پر دھاندلی کا الزام عائد کیا جسے الیکشن کمیشن نے واضح طور پر مسترد کر دیا۔