اسلام آباد ہائی کورٹ، لاپتہ شہری کی بازیابی کے لئے دائر درخواست کی سماعت 17 ستمبر تک ملتوی

جمعہ 17 اگست 2018 15:20

اسلام آباد ۔ (اُردو پوائنٹ اخبارتازہ ترین - اے پی پی۔ 17 اگست2018ء) اسلام آباد ہائی کورٹ نے لاپتہ شہری کی بازیابی کے لئے دائر درخواست کی سماعت 17 ستمبر تک ملتوی کر دی۔ جمعہ کو عدالت عالیہ کے جسٹس اطہر من اللہ پر مشتمل سنگل رکنی بینچ نے سماعت کی۔

(جاری ہے)

اس موقع پر درخواست گذار کی جانب سے محمد عتیق اور چوھدری اصغر علی ایڈوکیٹ اور جے آئی ٹی سربراہ ایس پی سی آئی اے گلفام ناصر وڑائچ سمیت سات رکنی ٹیم عدالت میں پیش ہوئی۔

درخواست گذار کے وکیل عتیق ایڈووکیٹ نے عدالت سے استدعا کی اسلام آباد پولیس درخواست گذار کے ساتھ تعاون نہیں کر رہی۔ اس موقع پر جے آئی ٹی نے تحقیقات کے لیے عدالت سے مزید وقت مانگ لیا۔ عدالت نے جے آئی ٹی کو تحقیقات کے لیے مزید وقت دینے کی استدعا منظور کرتے ہوئے سماعت 17 ستمبر تک ملتوی کر دی۔