آئی ایم ایف کسی ترقی پزیر ملک کو اپنے پیروں پر کھڑا نہیں دیکھ سکتا،شاہد رشید بٹ

کراچی(اُردو پوائنٹ اخبارتازہ ترین - این این آئی۔ 18 اگست2018ء) اسلام آباد چیمبر آف سمال ٹریڈرز کے سرپرست شاہد رشید بٹ نے کہا ہے کہ پاکستان کو دیوالیہ ہونے سے بچانے کے لئے آئی ایم ایف سے قرضہ لینا ملکی معیشت پر کاری ضرب ہو گی۔آئی ایم ایف کا نسخہ استعمال کرنے والے کسی ملک نے ترقی نہیں کی بلکہ ان کی معیشت بیٹھ گئی کیونکہ یہ کسی ترقی پزیر ملک کو اپنے پیروں پر کھڑا ہوتانہیں دیکھ سکتا۔

اگر آئی ایم ایف کی ہدایات اور مانیٹرنگ کی کوئی اہمیت ہوتی تو پاکستان سمیت قرضے لینے والے تمام ممالک کا یہ حال نہ ہوتا۔حکومت دیگر زرائع سے قرضہ لینے کی کوشش کرے۔شاہد رشید بٹ نے یہاں جاری ہونے والے ایک بیان میں کہا کہ آئی ایم ایف اور دیگر عالمی اداروں کے قرضوں سے ملک و قوم کے بجائے اشرافیہ کی ترقی ہوتی ہے اس لئے اس سلسلہ کو جتنی جلدی بند کیا جائے بہتر ہو گا۔

(جاری ہے)

انھوں نے کہا کہ صرف ن لیگ نے ہی خزانہ خالی نہیں چھوڑا بلکہ پاکستان پیپلز پارٹی نے ق لیگ نے بھی اپنے دور حکومت میںیہی کارنامہ سرانجام دیا جس سے انکی ملک اور عوام میں دلچسپی کا پتہ چلتا ہے۔سیاستدانوںکی اکثریت نے الیکشن سے قبل خزانہ خالی کرنا اپنا پیدائشی حق سمجھا ہوا ہے۔ انھوں نے امید ظاہر کی کہ نئی حکومت سابقہ حکومت کی طرح معیشت پر توجہ کے فقدان، بلند بانگ دعووںاوربے مثال کرپشن کی بیماری میں مبتلا نہیں ہو گی۔

اسے قرضوں، بڑھتی ہوئی بے روزگاری، غربت، سست رفتارترقی ، سرمایہ کاری میں کمی، بجٹ و مالیاتی خسارے اور برامدات میں اضافہ سمیت متعددسنگین چیلنجوں کا سامنا ہو گا جبکہ ایف بی آر ہمیشہ کی طرح مایوس کرے گا لئے اس ادارے کیلئے نجی شعبہ سے سربراہ کے انتخاب پر غور کیا جائے۔انھوں نے کہا کہ آئی ایم ایف سے قرضہ کی صورت میں حکومت کو نہ صرف سخت شرائط ماننا ہونگی جس کی بجلی سب سے پہلے غریب عوام پر ہی گرتی ہے جبکہ اس سے غربت میں کمی کا ایجنڈا بھی متاثر ہو گا۔