تاجر معاشی چیلنجز کا مقابلہ کرنے کے لیے پیشگی اقدامات اٹھائیں‘الماس حیدر

آنے والے سال مشکل ہے ،یہی مستقبل کی سمت واضح کرے گا‘صدر لاہور چیمبر آف کامرس

جمعہ 12 اکتوبر 2018 14:17

تاجر معاشی چیلنجز کا مقابلہ کرنے کے لیے پیشگی اقدامات اٹھائیں‘الماس ..

لاہور (اُردو پوائنٹ اخبارتازہ ترین - این این آئی۔ 12 اکتوبر2018ء) لاہور چیمبر آف کامرس اینڈ انڈسٹری کے صدر الماس حیدر نے تاجروں پر زور دیا ہے کہ وہ معاشی چیلنجز کا مقابلہ کرنے کے لیے پیشگی اقدامات اٹھائیں، آنے والے سال مشکل ہے اور یہی مستقبل کی سمت واضح کرے گا، پاکستان مشکل معاشی صورتحال سے باہر نکلنے کی بھرپور صلاحیت رکھتا ہے۔ انہوں نے ان خیالات کا اظہار ہال روڈ ٹریڈرز ایسوسی ایشن کے وفد سے خطاب کرتے ہوئے کیا۔

لاہور چیمبر کے سینئر نائب صدر خواجہ شہزاد ناصر، نائب صدر فہیم الرحمن سہگل، سابق سینئر نائب صدر ملک طاہر جاویداور سابق نائب صدر ذیشان خلیل نے بھی اس موقع پر خطاب کیا۔ الماس حیدر نے کہا کہ کڑی معاشی صورتحال نے حکومت کو آئی ایم ایف کے پاس جانے کے لیے مجبور کیا، اس کے سوا اور کوئی چارہ نہیں تھا۔

(جاری ہے)

انہوں نے کہا کہ آئی ایم ایف کسی کا دوست نہیں، قرض کے عوض یہ کڑی شرائط منواتا ہے۔

انہوں نے آمدن اور اخراجات کے درمیان توازن پیدا اور برآمدات بڑھانے کی ضرورت پر زور دیا۔ انہوں نے کہا کہ پاکستان کے پاس برآمد کرنے کو بہت کچھ ہے، عالمی حلال تجارت سے پاکستان بھرپور فائدہ اٹھاسکتا ہے، اس وقت 1.25ٹریلین ڈالر کی عالمی حلال تجارت میں پاکستان کا حصہ بہت کم ہے۔ انہوں نے کہا کہ امپورٹرز کو ایکسپورٹ پر بھی توجہ دینی چاہیے تاکہ درآمدات اور برآمدات کے درمیان بھاری عدم توازن ختم کیا جاسکے۔

بابر محمود نے کہا کہ ڈیوٹیوں او رٹیکسوں کی زیادہ شرح سمگلنگ کو فروغ دے رہی ہے لہذا حکومت اس طرف توجہ دے۔ انہوں نے کہا کہ ڈیوٹیوں اور ٹیکسوں کے نفاذ سے قبل سٹیک ہولڈرز سے مشاورت کی جائے۔ انہوں نے کہا کہ درآمدی موبائل فون پر کسی قسم کی پابندی عائد کرنے سے قبل پی ٹی اے سٹیک ہولڈرز سے مشاورت کرے۔