وفاقی وزیر اطلاعات و نشریات چوہدری فواد حسین کی ہدایت پر پی ٹی وی اور ریڈیو پاکستان میں 2008ء کے بعد تعینات ہونے والے ملازمین کی ڈگریوں کی تصدیق کے لیے بورڈ کا قیام

ڈگریوں کی تصدیق کا عمل ایک ماہ کے اندر مکمل کیا جائے گا، آغاز سینیئر افسران سے ہوگا، ایچ ای سی کی جانب سے ڈگریوں کی تصدیق نہ ہونے پر متعلقہ افسران و ملازمین اپنی وصول شدہ تنخواہیں واپس کریں گے، ایسے افراد کو ملازمت پر رکھنے والوں کو بھی نوٹس جاری کیے جائیں گے

پیر 15 اکتوبر 2018 12:49

وفاقی وزیر اطلاعات و نشریات چوہدری فواد حسین کی ہدایت پر پی ٹی وی اور ..

اسلام آباد ۔ (اُردو پوائنٹ اخبارتازہ ترین - اے پی پی۔ 15 اکتوبر2018ء) وفاقی وزیر اطلاعات و نشریات چوہدری فواد حسین کی ہدایت کے تحت پاکستان ٹیلیویژن اور ریڈیو پاکستان میں 2008ء کے بعد تعینات ہونے والے ملازمین کی ڈگریوں کی تصدیق کے لیے بورڈ تشکیل دے دیا گیا ہے، وزارت اطلاعات کے ڈائریکٹرجنرل انٹرنل پبلسٹی ونگ کی سربراہی میں تین رکنی بورڈ ڈگریوں کی تصدیق کا کام سرانجام دے گا۔

(جاری ہے)

وفاقی وزیر نے کہا کہ ڈگریوں کی تصدیق کا عمل ایک ماہ کے اندر مکمل کیا جائے گا، اس عمل میں ایچ ای سی کا نمائندہ بھی بطور معاون شریک ہوگا۔انہوں نے کہا کہ ڈگریوں کی تصدیق کے عمل کا آغاز سینیئر افسران سے کیا جائے گا اور جونئیر افسران سمیت تمام ملازمین کی ڈگریوں کی تصدیق کرائی جائے گی۔انہوں نے کہا کہ ایچ ای سی جن افسران و ملازمین کی ڈگریوں کی تصدیق نہیں کرے گا، وہ اپنی وصول شدہ تنخواہیں واپس کریں گے۔انہوں نے کہا کہ ایسے افراد کو ملازمت پر رکھنے والوں کو بھی نوٹس جاری کیے جائیں گے۔