کینسر کیئر ہسپتال کے تعاون سے اخوت ہیلتھ سروسز میں خواتین میں چھاتی کے کینسر سے آگاہی کیلئے دو روزہ فری میمو گرافی کیمپ کا انعقاد

جمعرات 25 اکتوبر 2018 15:49

لاہور (اُردو پوائنٹ اخبارتازہ ترین - این این آئی۔ 25 اکتوبر2018ء) کینسر کیئر ہسپتال کے تعاون سے اخوت ہیلتھ سروسز میں خواتین میں چھاتی کے کینسر سے آگاہی کیلئے دو روزہ فری میمو گرافی کیمپ کا انعقاد کیا گیا۔ کیمپ کا افتتاح سماجی رہنمارئیسہ اظہار اور ڈاکٹر عصمت لغاری نے کیا۔ کیمپ میں پہلے چالیس سال سے زائد عمر کی 70سے زائد خواتین کی میمو گرافی کی گئی ۔

اس موقع پر رئیسہ اظہار اور ڈاکٹر عصمت لغاری نے کہا کہ اس دور میں عوام کیلئے اتنی بڑی مفت سہولت مہیا کرنا بہت بڑا نیکی کا کام اور صدقہ جاریہ ہے۔ انہوں نے اخوت ہیلتھ سروسز اور کینسر کیئر ہسپتال کی کاوشوں کو سراہا ۔ ڈاکٹر افشین سہیل نے بتایا کہ ایشیاء اور خاص طور پر پاکستان میں خواتین میں چھاتی کا کینسر بڑی تیز ی سے پھیل رہا ہے اور بروقت تشخیص نہ ہونے کی وجہ سے بہت سی خواتین موت کے منہ میں چلی جاتی ہیں۔

(جاری ہے)

انہوں نے کہ اکہ اگر اس موذی مرض کی بروقت تشخیص ہو جائے تو اس کا علاج ممکن ہے ۔لیکن وسائل کے نہ ہونے کی وجہ سے متعدد خواتین اس سے محروم رہتی ہیں ۔ انہوں نے بتایا کہ بچوں کو دودھ نہ پلانے والی مائوں کو اس بیماری میں زیادہ مبتلاہونے کا خطرہ ہوتا ہے جبکہ چالیس سال کے بعد ہر خاتون کو دو سال بعد میمو گرافی کرانا ضروری ہے۔انہوں نے کہا کہ اخوت ہیلتھ سروسز غریب اور مستحق افراد کیلئے سالہاسال سے انتہائی مستعد ڈاکٹروں کی نگرانی اپنے پلیٹ فارم سے خدمات فراہم کر رہا ہے ۔ انہوں نے کینسر کیئر ہسپتال کی انتظامیہ کا بھی شکریہ ادا کیا کہ جنہوں نے غریب عوام کیلئے یہ سہولت مہیا کی ۔