جنسی ہراسگی ،ْایشیا اور یورپ میں گوگل ملازمین نے کام چھوڑ دیا

جمعرات 1 نومبر 2018 23:22

جنسی ہراسگی ،ْایشیا اور یورپ میں گوگل ملازمین نے کام چھوڑ دیا
نیویارک (اُردو پوائنٹ اخبارتازہ ترین - این این آئی۔ 01 نومبر2018ء) ایشیا اور یورپ میں گوگل کے ہزاروں ملازمین کمپنی میں جنسی ہراس کے واقعات کے خلاف احتجاج کرتے ہوئے کام چھوڑ دیا۔برطانوی اخبار دی گارڈین کے مطابق ملازمین کے احتجاج کا آغاز ٹوکیو سے صبح 11 بج کر 10 منٹ پر ہوا جس کے بعد دیگر مقامات پر بھی ملازمین کی جانب سے کام چھوڑنے کا سلسلہ شروع ہوا۔

ٹوئٹر پر گردش کرنے والی تصاویر میں گوگل کے سنگاپور، زیورخ، لندن، ڈبلن اور دیگر شہروں میں ملازمین کو کام چھوڑ کر دفاتر سے باہر نکلتے دیکھا گیا۔ بھارت میں بھی گوگل ملازمین نے دیگر ممالک کی طرح احتجاج میں حصہ لیا ۔ملازمین کا احتجاج جسے دی واک آؤٹ فار رئیل چینج کا نام دیا گیا ہے ،ْکا آغاز اس وقت ہوا جب گوگل نے انڈرائیڈ کے خالق اینڈی روبن کو جنسی ہراس کے الزامات کے باوجود 9کروڑ ڈالر کا ایگزٹ پیکج دیا گیا ہے۔

(جاری ہے)

ہڑتال کرنے والے ملازمین کے مطالبات میں برابر تنخواہ اور برابرمواقع فراہم کرنے کا مطالبہ بھی شامل ہے۔ گوگل کے چیف ایگزیکٹیو سندر پچائی نے اپنے ملازمین کے نام ایک ای میل میں کہاکہ ان کی کمپنی قابل اعتراض رویے کے خلاف ’سخت اقدام‘ کر رہی ہے۔سندر پچائی نے لکھا کہ انہوں نے متعدد ملازمین سے کام کے دوران قابل اعتراض رویے جیسے موضوع پر بات کی ہے اور یہ کہ کمپنی سابقہ اقدامات اور ملازمین کو ملنے والے درد پر شرمندہ ہے۔