وفاقی کابینہ میں تبدیلیوں کے بعد پنجاب کابینہ میں بھی تبدیلیوں کا امکان

لاہور(اردو پوائنٹ اخبار تازہ ترین۔18اپریل2019ء) وفاقی کابینہ میں قلمدانوں کی تبدیلی کے بعد صوبہ پنجاب کی کابینہ میں بھی تبدیلیوں کا امکان ظاہر کیا جا رہا ہے۔ ذرائع کے مطابق وزیراعلیٰ پنجاب عثمان بژدار چند روز میں وزیراعظم عمران خان سے ملاقات کریں گے اور وزراء کی تبدیلیوں کے حوالے سے مشاورت کریں گے۔ اس سے پہلے عثمان بژدار وزیراعظم سے ملاقات میں کچھ صوبائی وزراء کی کارکردگی کی شکایات کر چکے ہیں۔

اب ذرائع نے بتایا ہے کہ پنجاب میں ناقص کار کردگی دکھانے والے وزراء کو ان کے عہدوں سے ہٹا دیا جائے گا۔ جمعرات کے روز وزیراعظم کے دفتر سے ترجمان وزیراعظم نے اعلامیہ جاری کیا جس میں کئی وفاقی وزرا کو ان کے عہدوں سے ہٹا کر دوسرے عہدے دے دیے گئے جبکہ کچھ وزرا کو کابینہ سے نکال دیا گیا۔

(جاری ہے)

وفاقی کابینہ میں تبدیلیاں کرتے ہوئے وزیرِ پارلیمانی امور برگیڈیر ریٹائرڈ اعجاز شاہ کو وزیرِ داخلہ بنانے کا فیصلہ کا اعلان کیا گیا جبکہ وزیراطلاعات فواد چوہدری کو وزیراطلاعات کے عہدے سے ہٹا کر وزارتِ سائنس و ٹیکنالوجی کا قلمدان دیے جانے کا بھی اعلامیہ جاری کیا گیا۔

ان کے علاوہ فردوس عاشق اعوان وزیراعظم کی مشیر اطلاعات ہوں گی ظفر اللہ امروز کو مشیر صحت بنادیا گی اور ڈاکٹر حفیظ شیخ کو وزارتِ خزانہ کا قلمدان دے دیا گیا ہے۔ اب صوبہ پنجاب کی کابینہ میں بھی تبدیلیوں کا امکان ظاہر کیا جا رہا ہے۔ ذرائع کے مطابق وزیراعلیٰ پنجاب عثمان بژدار چند روز میں وزیراعظم عمران خان سے ملاقات کریں گے اور وزراء کی تبدیلیوں کے حوالے سے مشاورت کریں گے۔