ڈینگی سے بچائو کیلئے ارد گرد کے ماحول کو صاف رکھنا اور پانی کی فوری نکاسی انتہائی ضروری ہے،کمشنر ساہیوال

چیچہ وطنی (اُردو پوائنٹ اخبارتازہ ترین - اے پی پی۔ 31 اگست2019ء) کمشنر ساہیوال ڈویژن ندیم الرحمن نے کہا ہے کہ ڈینگی بخار ایک خطر ناک مرض ہے جس سے بچائو کیلئے ارد گرد کے ماحول کو صاف رکھنا اور پانی کی فوری نکاسی انتہائی ضروری ہے ۔معاشرے کے تمام طبقات کو چاہیے کہ وہ اپنے گھروں میں صفائی کو یقینی بنائیں اور محکمہ صحت کی ٹیموں کے ساتھ تعاون کریں تا کہ ڈینگی مچھر کی افزائش کو روکا جا سکے ۔

انہوں نے یہ بات اپنے دفتر میں ڈینگی مچھروں کی افزائش روکنے کے سلسلے میں ہونیوالے ایک جائزہ اجلاس کی صدارت کرتے ہوئے کہی جس میں پرنسپل ساہیوال میڈیکل کالج پروفیسر ڈاکٹر محمد طارق ،ڈائریکٹر ہیلتھ ڈاکٹر صادق سلیم ،ڈائریکٹر لوکل گورنمنٹ قاری خالد نذیر ،اے ڈی سی جنرل فاروق اکمل ازور سی ای او ہیلتھ ڈاکٹر اظہر نقوی کے علاوہ دوسرے متعلقہ افسران نے بھی شرکت کی ۔

(جاری ہے)

انہوں نے کہا کہ ڈینگی مچھرکا لاروا ختم کرنے میں کوئی کوتاہی برداشت نہیں کی جائے گی کیونکہ مچھروں کی افزائش کے بعد بخا ر کو روکنا ممکن نہیں ۔انہوں نے کھلی جگہوں ،مارکیٹوں ،ٹائر شاپس ،قبرستان اور کھیل کے میدانوں کی نگرانی سخت کرنے کی ہدایت کی اور کہا کہ تمام متعلقہ محکموں سے رابطہ بہتر کیا جائے اور ایسی تمام جگہوں کی مکمل چیکنگ یقینی بنائی جائے جہاں ڈینگی لاروا کی موجودگی ممکن ہو ۔

ڈائریکٹر ہیلتھ سروسز ڈاکٹر صادق سلیم نے بتایا کہ سال 2019 میں کے دوران ساہیوال ڈویژن میں ڈینگی بخار کا کوئی مریض سامنے نہیں آیا تاہم 44 مختلف جگہوں سے لاروا ملنے کے بعد چیکنگ کا عمل تیز کر دیا گیا ہے ۔انہوں نے بتایا کہ اب تک ڈویژن بھر میں 925 آئوٹ ڈور اور 796 ان ڈور جگہوں کی چیکنگ کی جا چکی ہے جس میں سے 46 آئوٹ ڈور اور12 ان ڈور جگہوں سے لاروا برآمد ہوا ۔کمشنر ندیم الرحمن نے تعاون نہ کرنے والے اداروں اور کمرشل مارکیٹوں کے خلاف سخت کارروائی کی بھی ہدایت کی اور کہا اس سلسلے میں کوئی کوتاہی برداشت نہیں کی جا سکتی ۔انہوں نے عوام کو ڈینگی بخار سے متعلق آگہی فراہم کرنے کیلئے خصوصی مہم چلانے کی بھی ہدایت کی ۔