پاکستان اور چین کے درمیان 8 ارب ڈالرز سے زائد مالیت کے ایم ایل 1 منصوبے کا معاہدہ طے پاگیا

لاہور (اُردو پوائنٹ اخبارتازہ ترین۔ 09 اکتوبر2019ء) پاکستان اور چین کے درمیان 8 ارب ڈالرز سے زائد مالیت کے ایم ایل 1 منصوبے کا معاہدہ طے پاگیا، وزیر ریلوے شیخ رشید احمد کا کہنا ہے کہ کراچی سے پشاور تک ریلوے ٹریک کی لمبائی تقریبا 1800 کلومیٹر ہوگی، منصوبے کو حتمی شکل دے دی، اگلے 3-4 سال میں منصوبہ مکمل ہو جائے گا۔ تفصیلات کے مطابق پاکستان اور چین نے سی پیک کے تحت اربوں ڈالرز کے ایم ایل ون منصوبے کو حتمی شکل دے دی ہے۔

یہ بات وفاقی وزیر ریلوے شیخ رشید احمد نے بدھ کو میڈیا کو بتائی۔انہوں نے کہاکہ میں نے آج صبح اپنے چینی ہم منصب کے ساتھ ملاقات کی اور اس منصوبے کو حتمی شکل دی۔ وفاقی وزیر ریلوے شیخ رشید احمد وزیر اعظم عمران خان کے ہمراہ اس وقت چین کا دورہ کرنے والے وفد کا حصہ ہیں۔

(جاری ہے)

وزیر اعظم عمران خان کا اس منصوبے میں زبردست دلچسپی لینے پر اظہار تشکر کرتے ہوئے انہوں نے کہا کہ پاکستان ریلوے کے لئے ایک اہم منصوبہ ایم ایل ون 14 سال بعد ایک حقیقی شکل اختیار کر گیا ہے۔

وزیر ریلوے نے کہا کہ انہوں نے ایم ایل ٹو (فاسٹ ٹرین) منصوبے کی فزیبلٹی رپورٹ بھی اپنے چینی ہم منصب کو فراہم کی ہے۔انہوں نے کہا کہ ہم اگلے 3-4 سال میں ایم ایل ون کی تکمیل کے بعد تیزرفتار ٹرین منصوبے پر جلد کام شروع کرنے کا ارادہ کر رہے ہیں۔شیخ رشید نے کہا کہ ایم ایل ون کی تکمیل کے بعد ، اس کی رفتار 65-105 کلومیٹر فی گھنٹہ سے بڑھ کر 120-160 کلومیٹر فی گھنٹہ ہوجائے گی، 2025 تک مال بردار نقل وحمل 6 سے 35 ٹن تک بڑھ جائے گی اور مال بردار نقل و حمل میں ریلوے کا حصہ بڑھ جائے گا۔

انہوں نے کہا کہ کراچی سے پشاور تک ریلوے ٹریک کی لمبائی تقریبا 1800 کلومیٹر ہوگی اور نیا سگنلنگ سسٹم لگایا جائے گا۔شیخ رشید نے کہا کہ نئے ٹریک پر کوئی کراسنگ نہیں ہوگی اور ایم ایل ون منصوبے کی تکمیل کے بعد ریلوے کے تمام موجودہ کراسنگز کو ختم کردیا جائے گا۔ واضح رہے کہ ایم ایل 1 کو پاکستان کیلئے سب سے اہم ترین اور گیم چینجر منصوبہ قرار دیا جاتا ہے۔ اس منصوبے پر کل لاگت ساڑھے 8 ارب ڈالرز بتائی جاتی ہے۔