Live Updates

مسلم لیگ (ق) کا پی ٹی آئی حکومت سے تحفظات کا اظہار

ق لیگی وزیر کا کابینہ اجلاس کا بائیکاٹ، طارق بشیر چیمہ اجلاس میں شریک نہیں ہوئے، وزیراعظم عمران خان کا اتحادی جماعتوں کے تحفظات دور کرنے کا عزم

sanaullah nagra ثنااللہ ناگرہ منگل جنوری 17:38

مسلم لیگ (ق) کا پی ٹی آئی حکومت سے تحفظات کا اظہار
اسلام آباد (اردوپوائنٹ اخبارتازہ ترین۔14 جنوری 2020ء) پاکستان مسلم لیگ ق نے تحریک انصاف کے ساتھ تحفظات کا اظہار کردیا، مسلم لیگ ق کے وفاقی وزیر نے کابینہ اجلاس کا بائیکاٹ کیا، وفاقی وزیر طارق بشیر چیمہ اجلاس میں شریک نہیں ہوئے،اس کے برعکس وزیراعظم عمران خان نے اتحادیوں کے تحفظات دور کرنے کا عزم کرلیا۔ وزیر اعظم عمران خان کی زیرصدارت وفاقی کابینہ کا اجلاس ہوا، اجلاس میں 16 نکاتی ایجنڈے کا جائزہ لیا گیا۔

اجلاس میں ملک کی معاشی، سیاسی صورتحال اور امریکا ایران تنازع اور عالمی حالات پر تبادلہ خیال کیا گیا۔ کابینہ اجلاس میں حکومتی اتحادیوں کے تحفظات دورکرنے کیلئے بھی بات چیت کی گئی۔ ذرائع کا کہنا ہے کہ مسلم لیگ ق کے وفاقی وزیر نے کابینہ اجلاس کا بائیکاٹ کیا، وفاقی وزیر طارق بشیر چیمہ اجلاس میں شریک نہیں ہوئے۔

(جاری ہے)

وزیراعظم عمران خان نے کہا کہ اتحادی جماعتوں کے ہرحال میں تحفظات دور کریں گے، اتحادی جماعتوں نے ہر مشکل میں حکومت کا ساتھ دیا، اتحادیوں کو ساتھ لے کرچلیں گے۔

اتحادی جماعتوں کے تحفظات دور کرنے کیلئے کمیٹی قائم کردی ہے۔ حکومتی کمیٹی تمام اتحادیوں کے ساتھ رابطے میں ہے۔ اسی طرح اجلاس میں کابینہ نے پاک سعودیہ ایئرسروسزکے معاہدہ کی منظوری دے دی ہے۔ معاہدے کے تحت پاکستان میں سعودی ایئرلائنز کو تمام ایئرپورٹس تک رسائی حاصل ہوگی۔ جبکہ سعودی عرب میں پاکستانی ایئرلائنز کو تمام عالمی ایئرپورٹس تک رسائی حاصل ہوگی۔

معاہدے کے تحت پاکستان اور سعودی عرب کو دنیا بھر سے مسافروں کو لانے اور لے جانے کی اجازت ہوگی۔ نامزدہ کردہ ایئرلائنز لینڈنگ کے بغیر ایئرسپیس استعمال کرسکیں گے۔نامزد ایئرلائنز دنیا بھر کیلئے کارگواورڈاک کی ترسیل بھی کرسکیں گی۔نئے معاہدے سے دونوں ملکوں کی سیاحت کو فروغ ملے گا اور روزگار کے مواقع پیدا ہوں گے۔بتایا گیا ہے کہ سعودی سپریم کوآرڈینیشن کونسل کے اجلاس کے دوران معاہدے پر دستخط کیے جائیں گے۔

اسی طرح اجلاس میں وفاقی کابینہ کو فلور ایکٹ 2012 پر بریفنگ دی گئی۔ کابینہ اجلاس میں ہومیوپیتھک کالجز کے خلاف شکایات کے معاملہ کا جائزہ بھی لیا گیا۔ وزارت صحت میں اصلاحات سے متعلق بھی کابینہ کو بریفنگ دی گئی۔ اجلاس میں کابینہ نے کراچی، پشاور، لاہور اور ملتان میں کثیرالمنزلہ عمارتوں سے متعلق پالیسی کی منظوری بھی دے دی ہے۔ کابینہ نے بینکنگ کورٹ لاہور کے جج کی تقرری اور ایئرسیال کیلئے سیکیورٹی ڈپازٹ پالیسی کی منظوری بھی دے دی ہے۔
ایران اور امریکہ کے درمیان کشیدگی سے متعلق تازہ ترین معلومات