کرونا وائرس نے عوام کو مہنگائی اور مسائل کا رخ تبدیل کر دیا

سرگودہا(اُردو پوائنٹ اخبارتازہ ترین - این این آئی۔ 30 جنوری2020ء) کرونا وائرس نے عوام کو مہنگائی اور مسائل کا رخ تبدیل کر دیا حکومتی مشنری عوامی مسائل کے حل کی بجائے کرونا وائرس کی روک تھام میں مصروف ہو گئی اور سرگودھا سمیت چاروں اضلاع کے ڈی ایچ کیو ہسپتالوں میں خصوصی انسداد کرونا وارڈز قائم کرنے کا حکم دیتے ہوئے ڈویڑن میں مخدوش عمارتوں،انڈسٹریل ایریامیں انسانی جانوں کے تحفظ کو یقینی بنانے کی ہدایت کی گئی ہے۔

زرائع کے مطابق کمشنر سرگودہا ڈاکٹر فرح مسعودنے چاروں اضلاع کے ڈپٹی کمشنرز او رمحکمہ صحت کی انتظامیہ کو ہدایت کی ہے کہ کرونا وائرس کیلئے تمام ڈی ایچ کیو ہسپتالوں میں خصوصی حفاظتی وارڈز قائم کئے جائیں اور کرونا وائرس کے تشخیصی آلات دستیاب رکھیں جبکہ چاروں اضلاع میں مخدوش عمارات اور انڈسٹریل ایریاز کو کسی سانحہ سے قبل چیک کریں اور وہاں پر انسانی جانوں کے تحفظ کیلئے کئے جانے والے اقدامات اورانتظامات کو فول پروف بنایا جائے۔

(جاری ہے)

انہوں نے اضلاع کی کارکردگی بارے بریفنگ اجلاس کی صدارت کرتے ہوئے کہا کہ انتظامیہ کو کسی سانحہ سے رونما ہونے سے قبل انتظامات کو مکمل رکھنا چاہیے۔ ہر انسانی جان قیمتی ہے ان کا تحفظ ہماری ذمہ داری ہے اس سے اغماض برتنے والے افسران ناقابل برداشت ہیں ۔ انہوں نے شہری دفاع کے افسران کو ہدایت کی کہ وہ ضلعی وتحصیل انتظامیہ کے ساتھ مشترکہ طورپر شہری دفاع کاجائزہ لیں اور مخدوش او رخستہ حال رہائشی عمارتوں ‘کارخانوں ‘ فیکٹریوں ‘ پٹرول پمپوں ودیگر تجارتی وغیر تجارتی مراکز کا سروے کریں ۔مالکان کو خدشات وخطرات سے آگاہ کریں اورانہیں ناگہانی آفات سے بھی آگاہی دیتے رہیں ۔